ირანის მიერ გაშვებული დრონები ისრაელამდე 02:00 საათიდან 04:00 საათამდე მოაღწევს, – იუწყება „ქრონიკის“ სპეციალური კორესპონდენტი ილანა ჯანაშვილი თელ-ავივიდან.
მისი ინფორმაციით, მოსახლეობას განგაშის სიგნალის ჩართვიდან 10 წუთი ექნება თავშესაფარში გადასვლისთვის.
„ელოდებიან, რომ დრონები ისრაელამდე ღამის 02:00 საათიდან 04:00 საათამდე მოაღწევს, რადგან რამდენიმე ჯერზე გამოუშვეს. ზუსტად რა მიმართულებითაა გამოშვებული, ცნობილი არ არის, რადგან უმისამართოდ არის გაშვებული. თუმცა, ირანი აცხადებს, რომ მისი სამიზნე სამხედრო ბაზებია. ისრაელის პრესსპიკერმა გამოაცხადა, რომ საჰაერო ძალები მზადყოფნაშია. იმ შემთხვევაში, თუ განგაშის ხმა გაისმება, სტანდარტულად, 10 წუთში უნდა შევაფაროთ თავი თავშესაფარს. პრემიერ-მინისტრთან უკვე შეიკრიბა ომის კაბინეტი და გადაწყვეტენ, როგორ გააგრძელონ მოქმედება“, – გვაცნობა ჩვენმა კორესპონდენტმა.
მისივე ინფორმაციით, ადგილობრივი დროით 00:30 საათიდან ისრაელში აეროპორტები დაიკეტება.
„სკოლები, ბაღები, სასწავლო დაწესებულებები ხვალისთვის დაიხურა, ჯერჯერობით, ოფისებს ეს არ ეხება. ადგილობრივი დროით 00:30 საათზე ისრაელის აეროპორტები იკეტება. ასევე ყველა მეზობელი ქვეყანა კეტავს აეროპორტებს. იორდანიამ გამოაცხადა, რომ იმ დრონებს, რომლებიც მათ სივრცეში გაიფრენს, ჩამოგდებს, რომ ისრაელამდე არ მოვიდეს“, – ამბობს ილანა ჯანაშვილი.
როგორც ცნობილია ისრაელის თავდაცვით ძალებში დაადასტურეს, რომ ირანმა ისრაელის წინააღმდეგ დრონების გამოყენებით თავდასხმა დაიწყო. „ცოტა ხნის წინ ირანმა თავისი ტერიტორიიდან ისრაელის სახელმწიფოს ტერიტორიის მიმართულებით უპილოტო საფრენი აპარატები გაუშვა“, – ნათქვამია თავდაცვითი ძალების განცხადებაში.
ისრაელის არმიაში ხაზგასმით აღნიშნეს, რომ ყველა სამიზნეს აკონტროლებენ.