ისრაელის ომის კაბინეტი ვერ შეთანხმდა იმაზე, როგორ ან როდის უნდა უპასუხოს ირანის თავდასხმას. რამდენიმესაათიანი სხდომის შემდეგ გადაწყვეტილება ჯერ ისევ არ არის მიღებული.
ისრაელის ოფიციალურ პირებზე დაყრდნობით, ადგილობრივი და საერთაშორისო მედია წერს, რომ გადაწყვეტილების არარსებობის ფონზე, ისრაელის თავდაცვის ძალებმა უნდა წარმოადგინონ მოქმედების ვარიანტები.
ადგილობრივი მედია იუწყება, რომ ღამითვე ირანზე საპასუხო დარტყმის წინააღმდეგ წავიდნენ ისრაელის თავდაცვის მინისტრი იოავ გალანტი, თავდაცვის ძალების მეთაური ჰერცი ჰალევი და ომის კაბინეტის სხვა წევრები. პრემიერ ნეთანიაჰუს პოზიცია ამ დრომდე უცნობია.
აღსანიშნავია, რომ ისრაელს თავდაცვის კუთხით სრულ მხარდაჭერას უცხადებს შეერთებული შტატები, თუმცა აფრთხილებს, რომ ირანზე საპასუხო თავდასხმის შემთხვევაში, ის ოპერაციაში მონაწილეობას არ მიიღებს.
„გასული ღამე ისრაელისთვის ერთ-ერთი ყველაზე დრამატული იყო. ჩვენი სახელმწიფოს მიმართულებით ირანმა სხვადასხვა ტიპის ასობით, მათ შორის 100 ბალისტიკური რაკეტა გამოუშვა. სისტემატურმა მომზადებამ, რომელსაც ჩვენი პარტნიორების დახმარებით გავდიოდით, შთამბეჭდავ შედეგამდე მიგვიყვანა. ახლა ჩვენ გვაქვს შესაძლებლობა ირანის მხრიდან სერიოზული საფრთხის წინააღმდეგ სტრატეგიული ალიანსი შევქმნათ. ისრაელი, შეერთებული შტატები და სხვა პარტნიორები ამ საფრთხისგან დასაცავად ერთად დგანან“, – ისრაელი თავდაცვის მინისტრმა იოავ გალანტმა.