ჩვენ ვიცით „ნაცმოძრაობის“ ხელწერა: ისინი არიან ყველაფრის მკადრებლები. დევი ჭანკოტაძეს უბრალოდ წამოსცდა ის, რაზეც ეს პოლიტიკური ძალა შეიძლება ფიქრობდეს, – ამის შესახებ პრემიერ-მინისტრმა ირაკლი კობახიძემ ბრიფინგზე განაცხადა.
„სინამდვილეში, ეს ყველაფერი მათ ხელწერას აჩვენებს. მე ძალიან მკაცრად მინდა გავაფრთხილო ყველა – თავი შეიკავონ პროვოკაციებისგან. ჩვენ ვიცით „ნაცმოძრაობის“ ხელწერა: ისინი არიან ყველაფრის მკადრებლები. ყველაფერი უკადრებიათ წარსულში, ყველაფერი აქვს ნაკადრები ამ პარტიას, რაც კი შეიძლებოდა ეკადრა. ეს ორგანიზაციები, რომლებიც დღეს გამოდიან და მაღალ მატერიებზე გვესაუბრებიან, ბოლომდე ფუთავდნენ „ნაცმოძრაობის“ ქმედებებს, პატიმრების წამების და მკვლელობის ჩათვლის. აბა, გაიხსენეთ, 26 მაისს, როცა უტიაშვილმა ჯიხურების თავზე განათავსა ცხედრები, რამდენად მკაცრი იყო ამ „ენჯეოების“ განცხადებები? მაშინ ისინი იყვნენ ე.წ. გონგოები, ანუ სამთავრობო „ენჯეოები“. დღეს სხვა პოლიტიკური დღის წესრიგი აქვთ და ამიტომ არის გამჭვირვალობა მთავარი. საბოლოო ჯამში, გამჭვირვალობა გააჯანსაღებს პროცესს და, პირველ რიგში, ამ ენჯეოებს. თუ მათი საქმიანობა აქამდე არ იყო ჯანსაღი, გამჭვირვალობა ხელს შეუწყობს ამ ორგანიზაციების საქმიანობის გაჯანსაღებას.
რაც შეეხება დევი ჭანკოტაძეს, ის „ნაცმოძრაობის“ ერთ-ერთი სახეა. მას უბრალოდ წამოსცდა ის, რაზეც ეს პოლიტიკური ძალა შეიძლება ფიქრობდეს. შესაბამისად, კიდევ ერთხელ უმკაცრესად მინდა გავაფრთხილო ყველა – არ გაბედონ არანაირი პროვოკაციის მოწყობა და ნუ იყენებენ ადამიანებს „შიშველ იარაღად“ საკუთარი ვიწრო პოლიტიკური ინტერესების გასატარებლად. სახელმწიფო დგას თავის ადგილზე და 10%-ს ჩამოცდენილი „ნაცმოძრაობა“ მთელი თავისი კოლექტიური სატელიტებით ვერავითარი მასშტაბური პროვოკაციის მომწყობი ვერ არის. სახელმწიფო უმკაცრესად დაუპირისპირდება ნებისმიერ ასეთ მცდელობას. „ნაცმოძრაობას“ არ გაუვა ის, რაც გასდიოდა ხელისუფლებაში ყოფნის პერიოდში. ამას დამოუკიდებელ და სუვერენული ქართული სახელმწიფო არ დაუშვებს“, – აღნიშნა კობახიძემ.