“ მინდა ხვიჩა კვარაცხელიას და სხვებს, ჩემს უმცროს კოლეგებს ვუთხრა, რომ არ გამოიყენებოდეს მათი აზრი ერთმანეთის დასაპირისპირებლად”

ის განაცხადი, რომ ჩვენ ყველას ევროპა გვინდა, ეს ისედაც ნათელია. დიდი მადლობა მათ, რომ ასეთ განცხადებებს აკეთებენ, – ამის შესახებ „დღის ქრონიკაში“ „ხალხის ძალის“ ერთ-ერთმა ლიდერმა, დეპუტატმა მიხეილ ყაველაშვილმა განაცხადა, რითაც ქართველი სპორტსმენების მხრიდან საქართველოს ევროპული გზის მხარდამჭერი განცხადებები შეაფასა.

„როგორც ყოფილი ფეხბურთელი, მეც ისევ ისე განვიცდი ფეხბურთელების განცხადებას თუ Facebook-პოსტს, ჩემთვის ცოტა უხეშად არის წარმოჩენილი რიგი საკითხები. ჩვენ გვაქვს შესაძლებლობა, რომ ადამიანები ჩავრთოთ ამაში, მაგრამ პირიქით ვართ განწყობილები, რომ არც ერთ ადამიანს, იქნება ეს კულტურის მუშაკი თუ სპორტსმენი, არ უნდა ვაიძულოთ ან ვუთხრათ, რომ როგორმე ჩვენი მომხრეები გახდნენ ამ სიტუაციაში. რა თქმა უნდა, ის განაცხადი, რომ ჩვენ ყველას ევროპა გვინდა, ეს ისედაც ნათელია. დიდი მადლობა მათ, რომ ასეთ განცხადებებს აკეთებენ. მე ვიცი, როგორი მოწოდება არის, რომ მათ ეს განცხადებები გაეკეთებინათ. ხვიჩა კვარაცხელიამ განაცხადა, რომ ევროპისკენ არის, და ახლა ყველა, ვინც შეკრებილი ვართ მიტინგზე, ვინც ხელისუფლების გადატრიალებას ითხოვს, ხვიჩა კვარაცხელია ჩვენთანაა. ეს მინდა ხვიჩას და სხვებს, ჩემს უმცროს კოლეგებს ვუთხრა, რომ არ გამოიყენებოდეს ეს მათი აზრი ერთმანეთის დასაპირისპირებლად. მინდა, რომ მათი სახელები არ იყოს გამოყენებული დასაპირისპირებლად. ძალა, რომელიც ცდილობს, ხვიჩა კვარაცხელიას აზრი გამოიყენოს მეორე ქართველის დასაპირისპირებლად, ეს არის მავნებელი ძალა. ეს ის ძალაა, რომელიც ხელმძღვანელობს დღეს ამ აქციებს“, – აღნიშნა ყაველაშვილმა.