უზენაესმა სასამართლომ ტელეკომპანია „რუსთავი 2“ ქიბარ ხალვაშს დაუბრუნა, თუმცა სასამართლოს არ უმსჯელია, თავად ქიბარ ხალვაშმა რამდენად კეთილსინდისიერად მიიღო ტელეკომპანიის წილები 2004 წელს, როდესაც არხის დამფუძნებლებს – დავით დვალსა და ჯარჯი აქიმიძეს ნოტარიუს ნუნუ გინტურის სანოტარო ოფისში საკონტროლო პაკეტი ოფიციალურად დაათმობინეს? ჰქონდა თუ არა ქიბარ ხალვაშს ბერკეტი, შეწინააღმდეგებოდა დვალი-აქიმიძისთვის ტელეკომპანიის ჩამორთმევას, ან როგორც მინიმუმ, მონაწილეობა არ მიეღო წილების გადაფორმებაში? „პრაიმტაიმთან“ საუბრისას დავით დვალი ამბობს, რომ ქიბარ ხალვაში პირველად ნოტარიუს ნუნუ გინტურთან გაიცნეს.
„ჰქონდა თუ არა რაიმე ბერკეტი, ამას რომ შეწინააღმდეგებოდა, ეს, ალბათ, უფრო ქიბარს უნდა ჰკითხოთ. ზეწოლის პროცესში უშუალოდ ქიბარი არ ფიგურირებდა და დიდი ეჭვი მაქვს, რომ არც მას ჰქონდა ინფორმაცია, რა ხდებოდა მანამდე. ჩვენ ის გავიცანით ნოტარიუს ნუნუ გინტურის ოფისში წილების გადაფორმების დროს. მან ძალიან მორიდებით გვითხრა, – ბიჭებო, მეც ისეთივე გაუგებრობაში ვარ, როგორც თქვენო“, – ამბობს დავით დვალი.
ვინ არის ნოტარიუსი ნუნუ გინტური, რომელსაც საზოგადოების ნაწილი ჯერ ოქრუაშვილის, შემდეგ კი ადეიშვილის პირად ნოტარიუსად იცნობს, ხოლო ზოგი მას ღამის ნოტარიუსადაც მოიხსენიებს, გამომდინარე იქიდან, რომ წინა წლებში ჩამორთმეულ ქონებებს ძირითადად ღამის საათებში აფორმებდა. მისი სახელი, „რუსთავი 2“-ის გარდა, სხვა არაერთ გახმაურებულ საქმეში ფიგურირებს, მათ შორისაა ტელეკომპანია „იბერიისთვის“ ლიცენზიის ჩამორთმევა. „პრაიმტაიმი“ ნუნუ გინტურს პირადად დაუკავშირდა და შეეცადა, გაერკვია, რა მოხდა 2004 წლის 16 ივნისს მის სანოტარო ბიუროში? აღმოჩნდა, რომ აწ უკვე ყოფილი ნოტარიუსი „რუსთავი 2“-ის საქმეზე პროკურატურამაც დაკითხა. მოგეხსენებათ, საგამოძიებო უწყებაში საჩივარი დავით დვალმა და ჯარჯი აქიმიძემ ჯერ კიდევ 2012 წელს შეიტანეს, თუმცა, როგორც ირკვევა, გამოძიება გაურკვეველი მიზეზით შეჩერდა. ჩვენთან საუბრისას ნუნუ გინტური ამბობს, რომ სანოტარო მოქმედების შესახებ საიდუმლოს სიცოცხლის ბოლომდე შეინახავს.
„კანონი ნოტარიუსის შესახებ მავალდებულებს სანოტარო მოქმედების საიდუმლოს შენახვას. ასე რომ, ვალდებული ვარ, ეს საიდუმლო სიცოცხლის ბოლომდე შევინახო, მიუხედავად იმისა, რომ დღეს მე ნოტარიუსი აღარ ვარ. არ მაქვს უფლება, პრესისთვის ინფორმაცია გავცე. გამოძიებასა და სასამართლოს რაც აინტერესებდა ჩემგან, ეს ინფორმაცია მათ უკვე მიღებული აქვთ. სადაც საჭირო იყო, ჩვენება ყველგან მიცემული მაქვს“, – გვითხრა ნუნუ გინტურმა.
ყოფილმა ნოტარიუსმა პროკურატურაში ჩვენება ტელეკომპანია „იბერიის“ საქმეზეც მისცა, სადაც პრაქტიკულად დაადასტურა, რომ „იბერია ტვ“-ის მფლობელს, ზაზა ოქუაშვილს, ასევე, 2004 წელს ლიცენზიის დათმობას აიძულებდნენ.
პროკურატურამ ტელეკომპანია „იბერიის“ დახურვისა და სამაუწყებლო ლიცენზიის ჩამორთმევის საქმე 2016 წლის თებერვალში გახსნა. უწყების ინფორმაციით, აღნიშნულ ფაქტთან დაკავშირებით ყოფილი გენერალური პროკურორი ზურაბ ადეიშვილი და მისი პირველი მოადგილე გიორგი ლაცაბიძე სისხლის სამართლის პასუხისგებაში მიეცნენ.
„ნუნუ გინტურმა დაადასტურა, რომ 2004 წლის მაისში ზაზა ოქუაშვილს სთხოვდნენ კომპანიის საკონტროლო პაკეტის დათმობას, 51%-ზეა საუბარი“, – განაცხადა „იბერიის“ სასამართლო პროცესზე პროკურორმა ემზარ გაგნიძემ. მისი ინფორმაციით, პირველ ჯერზე გარიგების ნოტარიულად დამოწმება ზაზა ოქუაშვილის წინააღმდეგობის გამო ვერ მოხერხდა, 2004 წლის დეკემბერში არხის მფლობელი იძულებული გახდა, დოკუმენტებზე ხელი მოეწერა.
„ეს ის პერიოდია, როდესაც ზაზა ოქუაშვილზე და მის კუთვნილ კომპანიებზე ხდება ინტენსიური შეტევა, ზეწოლა და მუშაობის შეჩერება. ზურაბ ადეიშვილმა და გიორგი ლაცაბიძემ ზაზა ოქუაშვილი იძულებული გახადეს, მათი მოთხოვნის შესაბამისად დაეთმო ტელეკომპანია „იბერიის“ ლიცენზია, რადგან წინააღმდეგ შემთხვევაში „ომეგა ჯგუფში“ შემავალი კომპანიები ვერ განაახლებდნენ მუშაობას“, – განაცხადა პროკურორმა.
თავის დროზე, ასევე, ნუნუ გინტურის ხელით გაფორმდა „ჭრელი აბანოებისა“ და რიყის ტერიტორიაზე არსებული საკუთრების ჩამორთმევის სკანდალიც. საუბარია იმ ქონებაზე, რომელიც 2006 წელს ეკონომიკის სამინისტრომ გადაიფორმა.
მაშინდელი ხელისუფლების მტკიცებით, რიყის ტერიტორიაზე რესტორნების მფლობელებს ერთ მშვენიერ დღეს, ყველას ერთად, „გაუჩნდათ სურვილი“, რომ მათ საკუთრებაში არსებული რესტორნები სახელმწიფოსთვის ეჩუქებინათ. გადაფორმებაც ერთ დღეს მოხდა და ყველა საქმეში ერთი და იგივე სანოტარო ბიურო ფიგურირებს, რომელიც სპეციალურად ამ მიზნით ღამით გაიხსნა.
დაახლოებით ანალოგიური სიტუაცია იყო ჭრელ აბანოებთან დაკავშირებითაც, რომელიც მესაკუთრეს სახელმწიფოსთვის გადააფორმებინეს. აღნიშნული ფაქტები ზურაბ ადეიშვილის გენერალური პროკურორობის პერიოდში განხორციელდა. ამ შემთხვევებთან დაკავშირებით ადვოკატებმა არაერთხელ შეიტანეს საჩივრები პროკურატურაში, მაგრამ რეაგირება ჯერაც არ მომხდარა.
აღსანიშნავია, რომ ამ ქონებების ჩამორთმევა, როგორც ამბობდნენ, აუცილებლად ღამის საათებში ხდებოდა. სამივე შემთხვევა ნუნუ გინტურმა გააფორმა. მართალია, დღეს ის ბურუსით მოცულ გადაფორმებებზე არ საუბრობს, მაგრამ ჯერ კიდევ ორიოდე თვის წინ დაგვპირდა, რომ მის მიმართ გამოთქმულ ბრალდებებს საგანგებო პრესკონფერენციით უპასუხებდა, თუმცა ნოტარიუსი მაშინაც ჩვენ მიერ დასმული რამდენიმე კითხვაზე პასუხის გაცემით შემოიფარგლა და კონკრეტულ საქმეებზე ამ დრომდე დუმილს არჩევს.
ნუნუ გინტური, ყოფილი ნოტარიუსი:
– ჩემთვის გაუგებარია, რატომ მაკავშირებენ ადეიშვილთან და სხვებთან. ჩემთან ოფისში მოსულ კლიენტებს შორის არასდროს მინახავს რაიმე პრობლემური ურთიერთობა. არასდროს შემინიშნავს, რომ ვინმეს რაღაცას იძულებით აკეთებინებდნენ. არც ერთი ნოტარიუსი არ შეასრულებდა სანოტარო მოქმედებას, ეს რომ ყოფილიყო მისთვის ცნობილი. სადაც არ უნდა დამკითხონ, თუ რომელიმე მხარე, რომელიმე მესაკუთრე იტყვის, რომ ნოტარიუსთან რაიმე იძულებას ჰქონდა ადგილი, ან ნოტარიუსის ზემოქმედებით, ან არასწორი მოქმედებით ისინი დაზარალდნენ, მე ვინ დამინდობს? და რა თქმა უნდა, პასუხი უნდა ვაგო. რაღაც ლეგენდა შექმნეს ამისგან. მე რატომ გავპიარდი ასეთ ცუდ ჭრილში, ამას ვერ ვხსნი. ძალიან დავიღალე ამ ყველაფრისგან.
– ღამით, არასამუშაო საათებში რომ მოდიოდა ეს ხალხი თქვენთან ასეთი ხელშეკრულებების გასაფორმებლად, არც ამან მოგცათ რამე ეჭვის საფუძველი?
– აგიხსნით ამასაც. წესით, ამ დეტალებზე არ უნდა ვსაუბრობდე, მაგრამ მეც მინდა, ვიღაცებმა გაიგონ სიმართლე. ნოტარიუსი ვარ და ჩემი კანონი მავალდებულებს, როცა ნოტარიუსი აღარ ვიქნები, მაშინაც შევინახო ეს საიდუმლო. მე ვიტყვი ერთს: თუ საჯარო რეესტრის საიტს გახსნით, ნახავთ, რომ ეს სანოტარო მოქმედებები არის გაკეთებული, თუ არ ვცდები, ნოემბერ-დეკემბერში, ანუ წლის იმ პერიოდში, როდესაც 6 საათზე უკვე ღამეა. შეიძლება შებინდებული იყო, მაგრამ არც ერთი სანოტარო მოქმედება არ შესრულებულა შუაღამისას. ღამის ნოტარიუსს რომ მეძახიან, ეს არის სარკაზმი. მაქსიმუმ 8, 9 საათს არ გადასცდენია არც ერთი გაფორმება. როცა სანოტარო მოქმედებას ვიწყებ 4 საათზე, ან ხუთზე, არ შეიძლება ის 15 წუთში გაამზადო. იმას სჭირდება დრო, მომზადება, სამართლებრივი შეფასება. ეს არ იყო ფიზიკური პირების საკუთრება, ეს იყო შპს-ების საკუთრება. უნდა გამომეძახებინა აუცილებლად შპს-ს დამფუძნებელი. უნდა დამედგინა მათი ნება, უნდა შემედგინა კრების ოქმები, ამ კრების ოქმებზე პარტნიორთა ხელმოწერები უნდა დამედასტურებინა. უნდა მომეგროვებინა საკუთრების დამდგენი სხვა საჭირო დოკუმენტები და ა.შ. თითოეულ ასეთ საქმეს 2-3 საათი მაინც სჭირდება და ამან გამოიწვია ეს ყველაფერი. არც კანონი დამირღვევია, არც მორალი, არც ქვეყნის მოღალატე არ ვარ და რატომ გამაპიარეს ასე ცუდად, ვერ ვხვდები.
– გინდათ თქვათ, რომ სააკაშვილის ხელისუფლების წარმომადგენლებთან კავშირი არ გქონიათ?
– უშუალო შეხება არც ადეიშვილთან და არც სააკაშვილთან არ მქონია. შემიძლია, ღვთის წინაშე დავიფიცო. არ მქონია არანაირი საქმიანი შეხება იმ ხალხთან.
– თვითონ ამ საქმეების შინაარსმაც არ დაგაეჭვათ, როდესაც შპს-ები თავისი ნებით ასე ერთბაშად ჩუქნიდნენ ქონებას სახელმწიფოს…
– ამასაც აგიხსნით: ყველა ერთად კი არ იყო მოსული ჩემთან… ეკონომიკის სამინისტროს გაცემული ჰქონდა მინდობილობა ერთ პირზე, როცა ჩემთან პირველი ასეთი საქმე გაკეთდა. პირველი მესაკუთრის ადვოკატი იყო მანამდე ჩემი კლიენტი. ეს იყო დავით სალაძე, რომელსაც ძალიან დიდ პატივს ვცემ. მან მოიყვანა თავისი კლიენტი ამ რიყის ხელშეკრულების გასაფორმებლად. ზუსტად არ მახსოვს, რომელი ობიექტი გააფორმეს. არც მისი კლიენტის გვარი მახსოვს. დათო სალაძემ მოიტანა ეკონომიკის მაშინდელი მინისტრის, გიორგი არველაძის მიერ გაცემული მინდობილობის ორიგინალი. ვინაიდან ეს მინდობილობა იყო ჩემთან, ამიტომაც მოხდა იმ დანარჩენი საქმეების ჩემთან გაფორმება.
– რაკი სალაძეს იცნობდით, ამიტომ არ შეგპარვიათ ეჭვი?
– რომ არ მცნობოდა, მაინც არ შემეპარებოდა. მე იმ დროისთვის 25 წლის გამოცდილების ნოტარიუსი ვიყავი. გამოცდილებაც მქონდა და კვალიფიკაციაც. მე თვითონ ადვოკატისგან ვიცი, მგონი, დავით სალაძისგან, ზუსტად არ მახსოვს, რომ მის კლიენტს ბიუჯეტის ვალი ჰქონდა და ვალში გადასცემდა ამ ქონებას. ეჭვი არ შემპარვია. რატომ უნდა მეკითხა, რატომ აკეთებდა ამას – ნოტარიუსს ეს არ ევალება. ეს მისი უფლება იყო.
– ასეთ საქმეებს განმეორებითი ხასიათი რომ ეძლეოდა და ყველას რომ ბიუჯეტის დავალიანება აღმოაჩნდა ერთბაშად, ან უბრალოდ სურვილი, სახელმწიფოსთვის ქონება ეჩუქებინა, არც ეს გახდა თქვენთვის ეჭვის საფუძველი?
– ამ თემაზე ვაპირებ სერიოზული პრესკონფერენციის გაკეთებას და ერთხელ და სამუდამოდ გაგაგებინებთ სიმართლეს. თუ ვინმეს პრეტენზია აქვს საქართველოში კაიქალობაზე, პატრიოტობასა და სამშობლოს სიყვარულზე, ერთ-ერთი პირველთაგანი ვარ, ჩემო საყვარელო, რა. ძალიან მაგარი ქალი ვარ, ყველაზე მაგრად მიყვარს ჩემი საქართველო და ჩემი ხალხი. ამას თუ დამინახავთ, დამინახეთ, თუ არადა გამწირეთ, მზად ვარ… დიდი მადლობა და პრესკონფერენციას რომ მოვიწვევ, დანარჩენს იქ მოგახსენებთ.
P.S. ასე შეწყვიტა მაშინ ჩვენთან საუბარი ნუნუ გინტურმა. სამწუხაროდ, მას ამ დრომდე პრესკონფერენცია არ გაუმართავს.
www.primetime.ge