მერიისთვის საკრებულო არის ერთ-ერთი უმთავრესი თანამოაზრე, ჩვენ ერთად უნდა ვაკეთებდეთ საქმეს და რისკი დადგა იმის, რომ ჩვენ ვეღარ შევძლებდით საკითხების გატანას, – ამის შესახებ რუსთავის მერმა, ნინო ლაცაბიძემ „დღის ქრონიკაში“ განაცხადა.
მისი განმარტებით, როდესაც ოპოზიცია გყავს საკრებულოში უმრავლესობაში და იქაც შიდა დაპირისპირებაა, ეს რისკი, რა თქმა უნდა, იზრდებოდა.
„გვაქვს შესაძლებლობა უფრო დეტალურად ავხსნათ თუ რა მოხდა დღეს რუსთავში, როგორც პოლიტიკურ ნაწილში, რომელიც საკრებულოში ვითარდებოდა, ასევე საკრებულოს მიღმა. ის ბრალდებები, რომელიც მათი მხრიდან ისმის, ძალიან მარტივად ასახსნელია, რომ ეს არის მოქალაქეების შეცდომაში შეყვანა. რომ ავხსნათ თავიდან რა ხდებოდა, „ნაციონალური მოძრაობა“ და პარტია „საქართველოსთვის“ წევრები რუსთავის საკრებულოში დღემდე იკავებდნენ ყველა იმ თანამდებობას, რომელიც საკრებულოში გვაქვს. როგორ მოხდა ეს – პარტიას „საქართველოსთვის“ ჰყავდა სამი წევრი და თუ არა „ნაციონალური მოძრაობის“ მხარდაჭერა, იმიტომ, რომ ჩვენი პარტიის წევრებს მხარი არ დაუჭერიათ, ეს ადამიანები ვერ გახდებოდნენ თანამდებობის პირები. ვერ გახდებოდა ბატონი შეროზია თავმჯდომარე, მოადგილე და სწორედ პირველივე დღიდან მათი დამეგობრების დაიწყო თანამდებობების გადანაწილება, საკითხების გაჩერება, ქალაქისთვის მნიშვნელოვან გადაწყვეტილებებში არ იღებდნენ მონაწილეობას და უკვე მესამე წელია, რაც რუსთავის მერიის გუნდს გვიწევს ერთი ხელით ვაკეთოთ საქმე და მეორით, ვიბრძოლოთ მათი პოლიტიკური დაჯგუფების წინააღმდეგ იმისთვის, რომ არ შეფერხდეს რუსთავის განვითარება, დაიწყოს ახალი პროექტები, დასრულდეს – მიმდინარე.
გამოწვევები გვაქვს ძალიან ბევრი და ამ გამოწვევებზე ვცდილობთ, რომ რაღაცნაირად გამოსავალი და დაძლევის გზები მოვძებნოთ და მესამე წელია, მათი მანდატები, რომელიც მოსახლეობამ მისცა იმისთვის, რომ სწორედ ქალაქის სასიკეთოდ უნდა გამოეყენებინათ, მხოლოდ და მხოლოდ იყო გამოყენებული პოლიტიკური ვიწრო ინტერესებისთვის. რომ არა ამ ორი პარტიის გაერთიანება, რუსთავის საკრებულოში მინიმუმ ვერ შედგებოდა პირველი სხდომა, ვერ გადაინაწილებდნენ თანამდებობებს.
დღეს რაც დავინახეთ ბოლოს და რატომაც „ქართული ოცნების“ წევრების მხრიდან თანამდებობის პირების იმპიჩმენტის საკითხი დადგა, ეს იყო რისკები, რომელსაც უკვე „ქართული ოცნების“ წევრები ხედავდნენ. ბოლო პერიოდში განვითარებულმა მოვლენებმა გვაჩვენა ის, რომ “ნაციონალური მოძრაობა” დატოვა რამდენიმე წევრმა და ეს იმას ნიშნავს, რომ ამ პარტიაში იყო უკვე ძალიან მძიმე სიტუაცია, ალბათ, წნეხსაც ვეღარ გაუძლეს, რომლითაც ქალაქის ინტერესებიდან ვერ იღებდნენ გადაწყვეტილებას, არამედ, იღებდნენ პოლიტიკური დავალებებით, რაც არ არის ადამიანურად ალბათ მარტივი და დატოვა „ნაციონალური მოძრაობის“ რამდენიმე წევრმა პარტია. დატოვეს თანამდებობები, დაიწყო შიდა არეულობა.
მერიისთვის საკრებულო არის ერთ-ერთი უმთავრესი თანამოაზრე, ჩვენ ერთად უნდა ვაკეთებდეთ საქმეს და რისკი დადგა იმის, რომ ჩვენ ვეღარ შევძლებდით საკითხების გატანას, როდესაც ოპოზიცია გყავს საკრებულოში უმრავლესობაში და იქაც შიდა დაპირისპირებაა, ეს რისკი, რა თქმა უნდა, იზრდებოდა“, – განაცხადა ნინო ლაცაბიძემ.
„ქართულმა ოცნებამ” ქალაქ რუსთავში გახარია/ნაცმოძრაობის კოალიცია დაშალა. გადაყენებულია საკრებულოს თავმჯდომარე – გადაწყვეტილება რუსთავის საკრებულოს დღევანდელ სხდომაზე მიიღეს. თავმჯდომარის გადაყენებას მხარი დაუჭირა საკრებულოს 18-მა წევრმა.