აზიის განვითარების ბანკის პერიოდული გამოცემა ADB Insight-ის მიერ ორგანიზებული დისკუსიის დროს, რომელშიც მონაწილეობენ საქართველოს ფინანსთა მინისტრი ლაშა ხუციშვილი, ADB-ის პრეზიდენტი მასა ასაკავა, EBRD-ის პრეზიდენტი ოდილ რენო-ბასო, საქართველოში აზიის განვითარების ბანკის 57-ე წლიური შეხვედრის მნიშვნელობაზე ისაუბრეს.
„წლიური შეხვედრისთვის რამდენიმე მიზეზის გამო ავირჩიეთ სლოგანი: „ხიდი მომავლისკენ“. უპირველეს ყოვლისა, ჩვენ ვპოზიციონირებთ, როგორც ევროპისა და აზიის დამაკავშირებელი ხიდი. ასევე, ამ ძალიან მნიშვნელოვან ღონისძიებას ვმასპინძლობთ საქართველოსთვის მეტად გადამწყვეტ დროს, რადგან ევროკავშირის კანდიდატი ქვეყნის სტატუსი გაგვაჩნია. ასევე ყველანი გამოვდივართ პანდემიის შედეგად მოყენებული ზიანიდან და ყველანი განვიცდით რეგიონულ კრიზისს. დაბოლოს, რაც არანაკლებ მნიშვნელოვანია, საქართველო უძველესი ქვეყანაა უდიდესი ისტორიით, ძალიან თანამედროვე საზოგადოებითა და ძალიან ნათელი, ახალგაზრდა თაობით, რაც ასევე ხაზს უსვამს იმ ფაქტს, რომ ქვეყანა წინ მიდის“, – აღნიშნა ფინანსთა მინისტრმა, ლაშა ხუციშვილმა.
აზიის განვითარების ბანკის პრეზიდენტმა, მასაცუგუ ასაკავამ განაცხადა, რომ განვითარებაზე ორიენტირებული მრავალეროვნული ბანკები კარგი გზა და ხიდია მომავლისკენ ნაბიჯის გადასადგმელად.
„ვფიქრობ, რომ განვითარებაზე ორიენტირებული მრავალეროვნული ბანკები კარგი გზა და ხიდია მომავლისკენ ნაბიჯის გადასადგმელად. ასევე ვფიქრობ, რომ მნიშვნელოვანია სამი ფაქტორი: პირველი არის კლიმატის ცვლილებაზე შესაბამისი რეაგირება, მეორე გახლავთ კერძო სექტორის კაპიტალის მობილიზება და მესამეა რეგიონული თანამშრომლობის გაღრმავება. ყოველივე ამით მოხდება გლობალიზაციის ხელშეწყობა. ეს სამი ფაქტორი თუ კარგად არის შერწყმული, ვფიქრობ, განვითარებაზე ორიენტირებული მრავალეროვნული ბანკები ძალიან ძლიერ ინსტრუმენტად წარმოჩნდებიან იმ გამოწვევების გადასაჭრელად, რომელთა წინაშეც ამჟამად ვიმყოფებით. დაბოლოს, ბატონო ლაშა, დიდი მადლობა, რომ წელს თქვენ მასპინძლობთ აზიის განვითარების ბანკის წლიურ შეხვედრას, მოუთმენლად ველოდები თბილისში ბევრი ადამიანის ხილვას“, – განაცხადა აზიის განვითარების ბანკის პრეზიდენტმა, მასაცუგუ ასაკავამ.
აღნიშნული დისკუსია აზიის განვითარების ბანკის პერიოდული გამოცემა „ADB Insight“-ის ორგანიზებით გაიმართა და მასში მონაწილეობენ ADB-ის პრეზიდენტი მასა ასაკავა, EBRD-ის პრეზიდენტი ოდილ რენო-ბასო. ინტერვიუს უძღვებოდა ნიშა პილაი, რომელიც წლების განმავლობაში BBC World News-ის ერთ-ერთი ყველაზე ცნობადი სახე და Asia Today-ის წამყვანი იყო.
დისკუსია წინ უსწრებდა აზიის განვითარების ბანკის 57-ე წლიურ შეხვედრას, რომელიც თბილისში 2-5 მაისს იმართება.