ევროპარლამენტარმა ბოლაჟ ჰიდვეგმა „ქრონიკასთან“ ექსკლუზიურ ინტერვიუში რუსეთ უკრაინის-ომზე ისაუბრა და ამ ომის დასრულების აუცილებლობაზე გაამახვილა ყურადღება. მისი თქმით, ცეცხლის შეწყვეტის შეთანხმების მისაღწევად ყველაფერი უნდა გაკეთდეს.
ამასთან, ევროდეპუტატი ამბობს, რომ სანქციების პოლიტიკა არათუ რუსეთზე ახდენს გავლენას, არამედ პირიქით, ევროპის საწინააღმდეგოდ მუშაობს.
„ვფიქრობ, აშკარაა, ვინ იღებს ყველაზე დიდ სარგებელს და ვინ არის მთავარი ბენეფიციარი რუსეთ-უკრაინის ომის – ეს არის აშშ. ამერიკელი პოლიტიკოსები კონგრესის წევრები, სენატორები ღიად საუბრობენ, რომ ეს ომი მათთვის კარგი ბიზნესია, რადგან ამ ომში არცერთი ამერიკელი არ იღუპება და იმავდროულად უარყოფით გავლენას ახდენენ რუსეთზე ეკონომიკურად და სამხედრო თვალსაზრისით. გარდა ამისა, იარაღის წარმოებისა და შესყიდვების გამო ამერიკული კომპანიებიც კი მოგებას ნახულობენ, ეს ძალიან ცინიკური მიდგომაა. შემთხვევითი არ არის, რომ ომის დაწყებიდან უნგრეთს ძალიან მკაფიო პოზიცია აქვს. ჩვენ ვემხრობით მშვიდობას, სამშვიდობო მოლაპარაკებებს და ცეცხლის შეწყვეტას. უნდა გავაკეთოთ ყველაფერი რომ მივაღწიოთ ცეცხლის შეწყვეტას, შემდეგ კი დავიწყოთ საკმაოდ რთული მოლაპარაკებები და სამშვიდობო შეთანხმებას მივაღწიოთ. სწორედ ეს შედის ევროპის ინტერესებში, თუმცა ევროკავშირის მშვიდობაზე საერთოდ არ საუბრობს, საუბრობს ამ ომის გაგრძელებაზე, უკრაინის მხარდაჭერაზე ისე რომ საბოლოო მიზნებზე ღიად არ ლაპარაკობს. ჩვენ არ გვაქვს მკაფიო ევროპული პასუხი კითხვაზე – რა არის ამ ომის საბოლოო მიზანი, როდის იქნება დასრულების დრო. რა ბედი უნდა ეწიოს ყირიმს, თუ მიზანი რუსეთში პოლიტიკური ვითარების შეცვლაა. ვხედავთ ადამიანთა საშინელ ტანჯვას. ვხედავთ ესკალაციას, გვაქვს რთული ვითარება. ჩვენს ინტერესებშია ამ ომის დასრულება, რუსეთთან ისეთი პოლიტიკური შეთანხმების მიღწევა, რომელიც უკრაინის გადარჩენის გარანტიას მოგვცემს, იქნება მშვიდობის გარანტია უკრაინელი ხალხისთვის. ფაქტია, რომ სანქციების პოლიტიკა არ მუშაობს, თუმცა, ევროკავშირი მაინც აგრძელებს მერამდენე სანქციების პაკეტების მიღებას. თავდაპირველად ირწმუნებოდნენ რომ ეს სანქციები ომს დაასრულებდა და რუსეთს დაასუსტებდა, თუმცა ამ სანქციებს ომი არ დაუსრულებია და არც რუსეთი დაუსუსტებია. პირიქით, ამ სანქციებმა ევროპული ეკონომიკა დააზიანა, ევროპელი ხალხი და ევროპული კომპანიები. ბევრი წევრი სახელმწიფოსთვის გართულდა ეკონომიკური წარმოების შენარჩუნება რუსული გაზისა და ნავთობის გარეშე. მოგეხსენებათ რუსეთთან ვაჭრობა მაინც გრძელდება, ზოგჯერ არაპირდაპირ ყიდულობენ შუამავლების მეშვეობით რუსულ გაზსა და ნავთობს ყიდულობენ. ასე რომ, ეს პოლიტიკა არ ამართლებს“, – განაცხადა ევროპარლამენტარმა.