ევროკავშირის საბჭომ ევროკავშირის გაფართოების შესახებ ანგარიში გამოაქვეყნა, რომელშიც განხილულია დასავლეთ ბალკანეთის ექვსი პარტნიორი ქვეყანა, ასევე თურქეთი, უკრაინა, მოლდოვა და საქართველო.
ანგარიშში აღნიშნულია, რომ ევროპული საბჭო კვლავ ადასტურებს კავშირის მზაობას, მხარი დაუჭიროს ქართველ ხალხს მათ ევროპულ გზაზე.
ამასთან, იგი „სერიოზულ შეშფოთებას გამოხატავს იმ კურსის მიმართ, რომელსაც საქართველოს მთავრობა ატარებს, მათ შორის უცხოური გავლენის გამჭვირვალობის შესახებ კანონის მიღებასთან, აგრეთვე სხვა კანონებთან დაკავშირებით, რომელიც ეწინააღმდეგება იმ ღირებულებებსა და პრინციპებს, რომლებსაც ევროკავშირი ეფუძნება და წარმოადგენს კანდიდატის სტატუსის მისაღებად კომისიის რეკომენდაციით გათვალისწინებული ნაბიჯების გაუარესებას“.
ანგარიში „მკაცრად გმობს ძალადობას მშვიდობიანი მომიტინგეების, მედიის წარმომადგენლებისა და პოლიტიკოსების მიმართ“ და აღნიშნავს, რომ „საქართველოს ხელისუფლებამ უნდა დაიცვას შეკრების და გამოხატვის თავისუფლების უფლება და თავი შეიკავოს ძალის გამოყენებისგან, ხოლო ძალადობის ყველა აქტი უნდა იყოს გამოძიებული და პასუხისმგებელი პირები დასჯილი“.
„საბჭო ღრმად არის შეშფოთებული დემოკრატიის, კანონის უზენაესობისა და ფუნდამენტური უფლებების სფეროებში უკანდახევის გამო. საქართველომ უნდა უზრუნველყოს ფუნდამენტური უფლებების სრული პატივისცემა, მათ შორის გამოხატვისა და შეკრების თავისუფლება, მედიის თავისუფლება, დამოუკიდებლობა და პლურალიზმი, ისევე როგორც LGBTIპირების უფლებები“, – ნათქვამია ანგარიშში.
საბჭო მოუწოდებს საქართველოს ხელისუფლებას, დაუყონებლივ დაუბრუნდეს ევროკავშირის გზას და მიიღოს დემოკრატიული, ყოვლისმომცველი და მდგრადი რეფორმები, რაც შეესაბამება ევროპული ინტეგრაციის ძირითად პრინციპებს.
საბჭო ასევე მტკიცედ მოუწოდებს საქართველოს, გამოიძიოს და განიხილოს საარჩევნო დარღვევები და ბრალდებები, განიხილოს ეუთო/ოდირის და ევროპის საბჭოს სხვა ორგანოების რეკომენდაციები.
ანგარიში ადასტურებს ევროკავშირის მხარდაჭერას საქართველოს სუვერენიტეტის, დამოუკიდებლობისა და ტერიტორიული მთლიანობის მიმართ მის საერთაშორისოდ აღიარებულ საზღვრებში და ხაზს უსვამს, რომ ევროკავშირი კვლავ მტკიცედ არის ერთგული კონფლიქტის მშვიდობიანი მოგვარებისა და არაღიარებისა და ჩართულობის პოლიტიკის მიმართ.