2024 წლის შემაჯამებელ პრესკონფერენციაზე სომხეთის თავდაცვის მინისტრმა, სურენ პაპიკიანმა განაცხადა, რომ სომხეთი და რუსეთი კვლავაც რჩებიან სტრატეგიულ მოკავშირეებად. ინფორმაციას ამის შესახებ სომხური მედია ავრცელებს.
„სომხურ-რუსული ურთიერთობები გრძელდება. არც სომხეთი აპირებს სადმე წასვლას და არც რუსეთი. ჩვენ კვლავაც ვრჩებით სტრატეგიულ მოკავშირეებად. ბუნებრივია, გვაქვს მოქმედი ხელშეკრულებები. შეიძლება გვქონდეს და აუცილებლად უნდა გვქონდეს მომსახურების ხელშეკრულებებიც. ეს ის საკითხებია, რომლებსაც არც რუსული და არც სომხური მხარე არ გაექცევა და არც უნდა გაექცეს“, – განაცხადა სომხეთის თავდაცვის უწყების ხელმძღვანელმა როდესაც ის სომხეთის მიერ განხორციელებული გადახდების სანაცვლოდ რუსეთისგან იარაღის მიუწოდებლობის საკითხს შეეხო.
2024 წლის ივნისში სომხეთის ეროვნული უსაფრთხოების საბჭოს მდივანმა არმენ გრიგორიანმა განაცხადა, რომ რუსეთი კვლავაც არ აწვდის 2021 ან 2022 წლებში გაფორმებული კონტრაქტების ფარგლებში გათვალისწინებულ იარაღს.