აშშ-ს წარმომადგენელთა პალატაში წარმოდგენილმა რესპუბლიკელებმა შეიმუშავეს კანონპროექტი, რომელიც არჩეულ პრეზიდენტ დონალდ ტრამპს უფლებას აძლევს, კუნძულ გრენლანდიის შეძენის საკითხზე დანიასთან მოლაპარაკებები აწარმოოს. ამის შესახებ რამდენიმე ამერიკული მედიასაშუალება იტყობინება, რომლებიც ასევე აღნიშნავენ, კანონპროექტის ინიციატორი ტენესის შტატიდან არჩეული კონგრესის წევრი ენდი ოგლსია.
კანონპროექტის სახელწოდებაა „მოდით, გავხადოთ გრენლანდია ისევ დიდებული“. დოკუმენტის დებულებების თანახმად, დონალდ ტრამპს, მისი ინაუგურაციის ცერემონიის დასრულებისთანავე შეეძლება, დანიის მთავრობასთან მოლაპარაკების მაგიდას მიუჯდეს.
„კონგრესი პრეზიდენტს ანიჭებს უფლებამოსილებას, 2025 წლის 20 იანვრის 12:01 საათიდან მიაღწიოს შეთანხმებას დანიის სამეფოსთან, რათა უზრუნველყოს აშშ-ს მიერ გრენლანდიის შემოერთება“, – ნათქვამია კანონპროექტში.
ოფიციალურ კოპენჰაგენთან შეთანხმების მიღწევიდან ხუთი დღის ვადაში, აშშ-ს პრეზიდენტმა ყველა შესაბამის საპარლამენტო კომიტეტს უნდა წარუდგინოს შეთანხმების ტექსტი, ყველა შესაბამის მასალასა და დანართთან ერთად.
შეერთებულ შტატებთან გრენლანდიის მიერთების მიმართ დიდი ინტერესი ტრამპმა არაერთხელ გამოხატა. მან დანიის წინააღმდეგ სამხედრო ძალის ან ეკონომიკური სანქციების გამოყენებაც არ გამორიცხა, როდესაც ეს იდეა გაახმოვანა.
კუნძული გრენლანდია, საუკუნეების განმავლობაში, დანიის მონარქიის მმართველობის ქვეშ იმყოფებოდა. 1536 წლიდან ის იყო დანიურ-ნორვეგიული სახელმწიფოს ნაწილი, 1814 წელს ფორმალურად გახდა დანიის კოლონია, 1979 წლიდან თვითმმართველობა მოიპოვა, ხოლო 2008 წლიდან გაფართოებული თვითმმართველობა გააჩნია.
დანიის სახელმწიფო პასუხისმგებელია გრენლანდიის საგარეო და თავდაცვის საქმეებზე. მისი სამართლებრივი სტატუსის შესაცვლელად, საკონსტიტუციო ცვლილებების განხორციელებაა საჭირო. გრენლანდიის პრემიერ-მინისტრმა, მუტე ბ. ეგედემ არაერთხელ განაცხადა, რომ გრენლანდია არ იყიდება და არც არასოდეს გაიყიდება.