საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, კაია კალასმა პალესტინის ადმინისტრაციის პრემიერ-მინისტრთან, მუჰამედ მუსტაფასთან შეხვედრა გამართა.
შეხვედრა მას შემდეგ შედგა, რაც ისრაელსა და „ჰამასს“ შორის ცეცხლის შეწყვეტისა და მძევლების გათავისუფლების შესახებ შეთანხმება გამოცხადდა.
„ეს შეთანხმება შეიძლება იყოს ნაბიჯი მდგრადი მშვიდობისკენ, თუმცა ყველამ ვიცით, რომ წინ ბევრი რთული გამოწვევა გველის“, – წერს კალასი სოციალურ ქსელში.
კაია კალასის თქმით, ევროკავშირი მზადაა, დახმარება გაუწიოს რეგიონს ჰუმანიტარული და რეაბილიტაციის კუთხით. ამ მიზნით ევროკავშირმა ღაზის სექტორისთვის უკვე გამოყო ახალი, 120 მილიონი ევროს ოდენობის დახმარების პაკეტი.
ამასთან, ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში აღნიშნა, რომ მიმდინარეობს მოლაპარაკებები რაფაჰში ევროკავშირის სადამკვირვებლო მისიის ხელახლა განთავსების შესახებ, რაც მიზნად ისახავს საზღვარზე სტაბილურობის უზრუნველყოფას.