გერმანიის კანცლერი ოლაფ შოლცი აცხადებს, რომ მოხარულია „ჰამასის“ მიერ სამი მძევლის გათავისუფლებით. შოლცის თქმით, ეს არის იმედის მომცემი, რომ სხვებიც გათავისუფლდებიან.
„მოხარული ვარ, რომ სამი მძევალი უკვე გათავისუფლდა. მე არაერთხელ ვესაუბრე „ჰამასის“ მიერ გატაცებულთა ნათესავებს, მათ შორის ისრაელშიც. შემიძლია, ვთქვა, რომ ეს საუბრები ძალიან რთული და დამთრგუნველია, ამიტომაც ეს არის იმედის ნიშანი, რომ სხვა მძევლებიც გათავისუფლდებიან და დაღუპულთა ცხედრებიც დაბრუნდება, რათა მათმა ახლობლებმა შეძლონ გამომშვიდობება. თუმცა მწარე სიმართლედ რჩება ის, რომ ყველა ამ ტანჯვის მიზეზი საშინელი ტერორისტული თავდასხმა იყო, თავდასხმა, რომლის მიზანიც ადამიანების დეჰუმანიზაცია იყო. ეს არასდროს უნდა დაგვავიწყდეს“, – აღნიშნა შოლცმა.
„ჰამასის“ ტყვეობაში მყოფი სამი მძევალი გათავისუფლდა. ისრაელის არმიაში განაცხადეს, რომ გათავისუფლებული სამი მძევალი უკვე ისრაელის ტერიტორიაზე იმყოფება. ისრაელის თავდაცვის ძალებმა სოციალურ ქსელში გაავრცელა ვიდეო, სადაც ჩანს, რომ წითელმა ჯვარმა სამივე მძევალი გადასცა სამხედროებს.