„ბიბისის“ ინფორმაციით, თეთრი სახლის პრესსპიკერმა, ქეროლაინ ლევიტმა განაცხადა, რომ აპირებენ, თავად განსაზღვრონ ის მედიასაშუალებები და ჟურნალისტები, რომლებსაც აშშ-ის პრეზიდენტთან უშუალო წვდომა ექნებათ.
როგორც „ბიბისი“ წერს, ცვლილებები ეხება იმ მედიასაშუალებებს, რომლებიც მონაწილეობას მიიღებენ ე.წ. პულში, რომლის წევრებიც პრეზიდენტის ღონისძიებებს აშუქებენ და მასალას სხვა მედიებს უზიარებენ.
„ამ ადმინისტრაციის პირობებში, თეთრი სახლის პრესის გუნდი თავად განსაზღვრავს, ვინ ისარგებლებს პრივილეგირებული და შეზღუდული წვდომით ისეთ სივრცეებში, როგორიცაა პრეზიდენტის თვითმფრინავი და ოვალური კაბინეტი“, – განაცხადა ლევიტმა ბრიფინგზე.
მისი განმარტებით, აღნიშნული ცვლილება საშუალებას მისცემს „ახალ მედიასაშუალებებს“, სტრიმინგ სერვისებსა და პოდკასტერებს, ასევე მოხვდნენ ე.წ. პულში.
„ტრადიციული მედიასაშუალებები, რომლებიც წლებია, აქ არიან, კვლავ მიიღებენ მონაწილეობას პულში, მაგრამ ახალი ხმებიც იქნებიან წარმოდგენილები“, – განაცხადა თეთრი სახლის პრესსპიკერმა.
1914 წლიდან თეთრი სახლის ე.წ. პულის რეპორტიორების როტაციას თეთრი სახლის კორესპონდენტთა ასოციაცია აწარმოებდა. ასოციაციაში განაცხადეს, რომ დაანონსებული ცვლილებები „ძირს უთხრის თავისუფალი პრესის დამოუკიდებლობას“.
როგორც „ბიბისი“ იუწყება, თეთრი სახლის პრესსპიკერმა ჟურნალისტებს სიახლის შესახებ იმ ფონზე აცნობა, როდესაც პრეზიდენტის ღონისძიებებზე დასწრება უკვე აუკრძალეს სააგენტო „ესოშიეთიდ პრესს“. სააგენტომ ეს გადაწყვეტილება სასამართლოში გაასაჩივრა და აკრედიტაციის აღდგენას ითხოვს. თეთრი სახლისა და „ასოშიეთედ პრესის“ დავა უკავშირდება სააგენტოს უარს, პუბლიკაციებში მექსიკის ყურეს ამერიკული ყურე უწოდოს. „ესოშიეთიდ პრესი“ აცხადებს, რომ ე.წ. პულში მონაწილეობის აკრძალვა არღვევს აშშ-ის კონსტიტუციის პირველი შესწორებით გარანტირებულ უფლებებს სიტყვისა და პრესის თავისუფლებასთან დაკავშირებით.
„ბიბისის“ ცნობით, საქმეზე სასამართლო მოსმენა 20 მარტსაა დანიშნული.