რუმინულმა პოლიციამ პრეზიდენტობის ულტრამემარჯვენე კანდიდატი, კელინ ჯორჯესკუ დააკავა და დაკითხვაზე მიიყვანა, რომელიც მისი წინასაარჩევნო კამპანიის გამოძიებას ეხება. ინფორმაციას Bloomberg-ი ავრცელებს.
ოპოზიციამ, რომელიც ჯორჯესკუს კანდიდატურას მხარს უჭერს, უკვე დააანონსა მიტინგი პროკურატურასთან.
მედიის ცნობით, პროკურატურა აგრეთვე იძიებს სისხლის სამართლის საქმეებს ჯორჯესკუს მოკავშირეებისა და დაცვის წევრების შესახებ.
„დაახლოებით 30 წუთის წინ სისტემამ ის [ჯორჯესკუ] საცობში გააჩერა და პროკურატურაში დაკითხვაზე გადაიყვანა! სად არის დემოკრატია, სად არიან პარტნიორები, რომლებმაც დემოკრატია უნდა დაიცვან?“, – ნათქვამია პოლიტიკოსის „ფეისბუქის“ გვერდზე გავრცელებულ განცხადებაში.
რუმინული მედია, თავის მხრივ, ავრცელებს ინფორმაციას, რომ პრეზიდენტობის კანდიდატს ბრალად ფაშისტური დაჯგუფების შექმნა და საარჩევნო კამპანიის დაფინანსების შესახებ ყალბი ინფორმაციის მიწოდება ედება.
გარდა ამისა, რუმინელმა სამართალდამცველებმა ჯორჯესკუსთან დაახლოებული 47 პირი გაჩხრიკეს, მათ შორისაა პოლიტიკოსის დაცვის უფროსი ხორაციუ პოტრა და მისი დაცვის წევრის პარტნიორი ქალი, რომელსაც, პოლიციის მტკიცებით, რუსეთის მაღალჩინოსნებთან მჭიდრო კავშირები აქვს.
ცნობისთვის, რუმინეთში საპრეზიდენტო არჩევნები 2024 წლის ნოემბერში გაიმართა. არჩევნების პირველ ტურში გამარჯვება კელინ ჯორჯესკუმ მოიპოვა, თუმცა დეკემბერში საკონსტიტუციო სასამართლომ რუსული ჩარევის მიზეზით საპრეზიდენტო არჩევნების შედეგები გააუქმა.