იერუსალიმში, მაცხოვრის აღდგომის ტაძარში მომლოცველები უკვე იკრიბებიან.
როგორც „ქრონიკის“ კორესპონდენტი იერუსალიმიდან იტყობინება, ტაძრის კარი უკვე გაიღო და მომლოცველებს შიგ შესვლის შესაძლებლობა მიეცათ. ისინი მაცხოვრის აღდგომის ტაძარში წმინდა ცეცხლის გარდამოსვლის თვითმხილველები გახდებიან. იერუსალიმში იმყოფებიან საქართველოდან ჩასული მომლოცველებიც.
„წმინდა ცეცხლის გარდამოსვლას ყველა მართლმადიდებლის ცხოვრებაში განსაკუთრებული დატვირთვა აქვს. ბევრი ქართველისთვის წმინდა მიწაზე ჩამოსვლა, იყო მნიშვნელოვანი – აღდგომის დღესასწაულს ისინი წმინდა მიწაზე შეხვდებიან. საელჩო ახერხებს იმას, რომ მაქსიმალურად ნორმალურ ვითარებაში მოხდეს ამ ხალხის ჩამობრძანება“, – განაცხადა საქართველოს საგანგებო და სრულუფლებიანმა ელჩმა ისრაელში, ზაზა კანდელაკმა.
დაახლოებით, 13:00 საათისთვის ტაძარში არაბი მართლმადიდებლები მივლენ. ტრადიციისამებრ, ყიჟინითა და შეძახილებით – „ჩვენი რწმენა მართალია“ მომლოცველებს ახარებენ.
იერუსალიმის პატრიარქი თეოფილე მესამე სასულიერო პირებთან ერთად მაცხოვრის აღდგომის ტაძარში დაახლოებით, 14:00 საათისთვის მივა. კუვუკლიასთან მას სხვა კონფესიის წარმომადგენლები გაჩხრეკენ, რის შემდეგაც იგი უფლის საფლავზე შევა და წმინდა ცეცხლის გარდამოსვლისთვის სპეციალურ ლოცვებს წაიკითხავს.
მაცხოვრის აღდგომის ტაძარში მომლოცველების შეშვება სპეციალური საშვებით ხდება. ტაძრის გარშემო და ზოგადად, იერუსალიმის ძველ ნაწილში უსაფრთხოების ზომები გამკაცრებულია. დადგმულია ბარიერები და ვითარებას პოლიცია აკონტროლებს.