20 აპრილს, ორი დღით ადრე, სანამ ისრაელსა და პალესტინის ტერიტორიებზე ვიზიტს დაიწყებდნენ, ისრაელის მთავრობამ 27 ფრანგ მემარცხენე კანონმდებელსა და ოფიციალურ პირს ვიზები გააუქმა. რამდენიმე დღით ადრე, ისრაელმა ქვეყანაში შესვლის უფლება მმართველი ლეიბორისტული პარტიის ორ ბრიტანელ პარლამენტარსაც შეუჩერა. ეს ყველაფერი ხდება დიპლომატიური დაძაბულობის ფონზე, რომელიც შექმნა პრეზიდენტ ემანუელ მაკრონის განცხადებამ, რომლის თანახმად, მალე საფრანგეთი პალესტინის სახელმწიფოს აღიარებს. თავს მხრივ, მაკრონის ეს განცხადება ნეთანიაჰუზე ზეწოლის მოხდენას ისახავდა მიზნად. ისრაელის შინაგან საქმეთა სამინისტროს ცნობით, 27-ვე პირს ვიზები გაუქმდა კანონის საფუძველზე, რომელიც ხელისუფლებას საშუალებას აძლევს, აკრძალოს ქვეყანაში იმ პირთა შესვლა, რომლებიც, შესაძლოა, ისრაელის სახელმწიფოს წინააღმდეგ მოქმედებენ.
საფრანგეთის პარტია „ეკოლოგისა“ და კომუნისტური პარტიის 17-მა წევრმა განაცხადა, რომ ისინი ისრაელის მხრიდან „კოლექტიური დასჯის“ მსხვერპლნი გახდნენ და მაკრონს საქმეში ჩარევისკენ მოუწოდეს. მათ მიერ გაკეთებულ განცხადებაში ნათქვამია, რომ ისინი იერუსალიმში, ხუთდღიანი ვიზიტით, საფრანგეთის საკონსულომ მიიწვია. მათივე თქმით, ისინი აპირებდნენ ისრაელისა და პალესტინის ტერიტორიების მონახულებას, „საერთაშორისო თანამშრომლობის და მშვიდობის განმტკიცების მიზნით“. „გამგზავრებამდე ორი დღით ადრე, ისრაელის ხელისუფლებამ გააუქმა ჩვენი შესვლის ვიზები, რომლებიც ერთი თვის წინ დამტკიცდა“, – განაცხადეს მათ.
„გვინდა გავიგოთ, რამ გამოიწვია ეს უეცარი გადაწყვეტილება, რომელიც კოლექტიურ დასჯას ჰგავს“, – აღნიშნა ფრანგ კანონმდებელთა ჯგუფმა.
„სერიოზული დარღვევა“
დელეგაციაში შედიოდნენ ეროვნული ასამბლეის დეპუტატები: ფრანსუა რუფინი, ალექსის კორბიერი და ჯული ოზენი პარტია „ეკოლოგიდან“, კომუნისტი დეპუტატი, სუმია ბურუაჰა და კომუნისტი სენატორი, მარიანა მარგეიტი. დელეგაციის სხვა წევრებს ქალაქების მემარცხენე მერები და ადგილობრივი კანონმდებლები წარმოადგენდნენ. მათ განცხადებაში ისრაელში შესვლის აკრძალვა შეფასდა, როგორც „დიპლომატიური ურთიერთობების სერიოზული დარღვევა“. „არჩეული თანამდებობის პირებისა და პარლამენტარების ვიზიტისთვის მიზანმიმართულად ხელის შეშლა არ შეიძლება რეაგირების გარეშე დარჩეს“, – განაცხადეს მათ და მოითხოვეს შეხვედრა მაკრონთან, ასევე მთავრობის მხრიდან ზომების მიღება, რათა ისრაელმა ქვეყანაში მათი შესვლის უფლება გასცეს.
ფრანგი პოლიტიკოსების ჯგუფი ამბობს, რომ მათი პარტიები ათწლეულების განმავლობაში ითხოვდნენ პალესტინის სახელმწიფოს აღიარებას, რაც გასულ კვირას მაკრონის მიერ გაკეთებული განცხადების თანახმად, შესაძლოა, ივნისში საერთაშორისო კონფერენციაზე მოხდეს. ამ თვის დასაწყისში, ისრაელის ხელისუფლებამ ბრიტანეთის პარლამენტის წევრები, იუან იანგი და აბთისამ მოჰამედი თელ-ავივის აეროპორტში დააკავა და, იგივე მიზეზით, ქვეყნიდან გააძევა. ბრიტანეთის საგარეო საქმეთა მინისტრმა, დევიდ ლამმა ისრაელის ასეთ ქმედებას „მიუღებელი“ უწოდა. თებერვალში ისრაელმა ასევე შეაჩერა ევროპარლამენტის ორი მემარცხენე წევრის, ფრანკო-პალესტინელი რიმა ჰასანისა და ირლანდიელი ლინ ბოილანის ისრაელში შესვლა. ამასთან, ისრაელის პრემიერ-მინისტრმა, ბენიამინ ნეთანიაჰუმ მძაფრი რეაგირება მოახდინა საფრანგეთის მიერ პალესტინის სახელმწიფოს შესაძლო აღიარებაზე. მისი თქმით, ისრაელის გვერდით პალესტინის სახელმწიფოს შექმნა „ტერორიზმისთვის დიდი ჯილდო“ იქნება.