პარლამენტის საგამოძიებო კომისიის მნიშვნელობაზე ისაუბრა პარლამენტის ვიცე-სპიკერმა, „ხალხის ძალის“ თავმჯდომარემ სოზარ სუბარმა და ხაზგასმით აღნიშნა, რომ დასკვნა, რომელსაც კომისია დადებს, სამართლიანობის აღდგენისკენ გადადგმული დიდი ნაბიჯი იქნება.
ამასთან, როგორც კომისიის მდივანმა განაცხადა, კომისია დიდ წვლილს შეიტანს საზოგადოების, განსაკუთრებით კი, ახალგაზრდების ინფორმირების საქმეში.
„სამართლიანობის აღდგენისკენ გადადგმული ერთი მნიშვნელოვანი ნაბიჯი იქნება ამ კომისიის ჯერ მუშაობა და მერე დასკვნა, იმიტომ, რომ ეს იქნება დოკუმენტი, რომელიც დარჩება, როგორც საქართველოს თანამედროვე ისტორიის ერთი შემზარავი, მაგრამ ძალიან მართალი ნაწილი. შემზარავი იმით, თუ რა ხდებოდა ჩვენს სამშობლოში ნაცისტური რეჟიმის ბატონობის დროს და ამავდროულად გაფრთხილება, რომ მომავალში მსგავსი რამ აღარ უნდა განმეორდეს. თორემ დღეს ვხედავთ, რომ თითქოს ნავლი გადაეფარა ამ წარსულს და მისი შემოქმედები მზად არიან, ისევ დაბრუნდნენ და უარესი გაიმეორონ.
მეორე, ახალგაზრდობა, რომელსაც შეიძლება ბევრი რამე არ ახსოვს, უყურებს ამ შემზარავ ისტორიებს და, დარწმუნებული ვარ, რომ ბევრ მათგანს აეხილება თვალი ბევრ საკითხზე. ხალხი, ახალგაზრდობა გაიგებს, თუ რა რეჟიმში ვცხოვრობდით და დარწმუნდება, რომ იმ დროის დაბრუნება დაუშვებელია.
და მესამე და შეიძლება ყველაზე მნიშვნელოვანი – მკაფიოდ იკვეთება სააკაშვილის ნაცისტური რეჟიმის ანტიქართული სახე: როგორ ხდებოდა განათლების სისტემის განადგურება, როგორ ებრძოდნენ ქართულ მეცნიერებას, მწერლობას, ხელოვნებას, როგორ ხდებოდა სახელმწიფო უნივერსიტეტების მიტაცება სააკაშვილის ოჯახის წევრებისა თუ მისი მინისტრების მიერ, როგორ დაიხურა 1100-ზე მეტი საჯარო სკოლა და მათ ნაცვლად როგორ იხსნებოდა მათივე საკუთრებაში არსებული კერძო სკოლები ან სხვადასხვა საწარმოები (მაგალითად თხილის საწარმო ვანის მუნიციპალიტეტის ერთ-ერთი სოფლის სკოლის შენობაში), ან როგორ იხურებოდა საბავშვო ბაღები და როგორ თავსდებოდა ამ შენობებში ნაციონალური მოძრაობის ოფისები,” – განაცხადა სოზარ სუბარმა.