ბალტიისპირეთის ქვეყნების სანქციებიც, შეურაცხყოფის ფორმებიც უკვე გაცვეთილია და ამით მხოლოდ თავის თავს აზიანებენ, – ამის შესახებ პარტია „ხალხის ძალის“ აღმასრულებელმა მდივანმა, გურამ მაჭარაშვილმა საქართველოს პირველ არხს განუცხადა.
მაჭარაშვილის თქმით, „დიფ სთეითი“ ყველაზე ძლიერი ბალტიისპირა ქვეყნებშია“.
„ევროპულმა ქვეყნებმა ბალტიისპირელები არ მიიწვიეს, როცა უკრაინის ომის საკითხები უნდა გადაწყვეტილიყო. რატომ? იმიტომ, რომ, სამწუხაროდ, ხელისუფლებაში „დიფ სთეითის“ პირდაპირი წარმომადგენლები არიან, თორემ საზოგადოების დონეზე ვმეგობრობთ. მათი სანქციებიც და შეურაცხყოფის ფორმებიც უკვე გაცვეთილია. ამით მხოლოდ თავის თავს აზიანებენ და ორ ქვეყანას შორის განვითარებას ხელს ვერ უწყობენ. ეს იმდენად მომაბეზრებელია, ზოგიერთ შემთხვევაში, უკვე საწყენია, რომ ბალტიისპირელებმა ვინმე არ დაასანქცირეს. მათ განაცხადეს, რომ უკრაინაში მშვიდობა რისკს წარმოადგენს ესტონეთისთვის, ლატვიისთვის, ლიეტუვისთვის. მათი აზრით, თუ უკრაინაში მშვიდობა იქნება, შეიძლება, რუსეთმა ბალტიის ქვეყნებისთვის მოიცალოს. ამას არ მალავენ. ანუ, ყველაფერს აკეთებენ, რათა უკრაინაში ომი არ დასრულდეს. საქართველოს მიმართ ინტერესია, რადგან რუსეთის მიერ საქართველოს ტერიტორიების ნაწილი ოკუპირებულია და, მათი გადმოსახედიდან, მეორე ფრონტის გახსნა საქართველოში უფრო მარტივია, ვიდრე სხვაგან. ერთგვარ გადაზღვევას აკეთებენ, რომ უკრაინაში თუ მშვიდობა იქნება, შემდეგ საქართველოს ჯერი იყოს და არცერთ შემთხვევაში არ იყოს ბალტიისპირა ქვეყნები. ამას არ მალავენ. მათი აზრით, ომი ყველგან უნდა იყოს, მათი ქვეყნების გარდა“, – განაცხადა გურამ მაჭარაშვილმა.