5 აგვისტოს რუსეთის გენერალურმა პროკურატურამ საერთაშორისო ძებნა გამოაცხადა ქართველ პოლიტიკოსზე, „ლელოს“-„ძლიერი საქართველოს“ ერთ-ერთ ლიდერ ალექსანდრე (ალეკო) ელისაშვილზე.
გამოძიება მიმდინარეობდა, როგორც უკრაინის მხარეს „დაქირავებული მებრძოლის“ წინააღმდეგ. დასრულების შემდეგ საქმე რუსეთის მიერ ოკუპირებული დონეცკის ე.წ „სახალხო რესპუბლიკის სასამართლოს“ გადაეცა.
მას ბრალი დაუსწრებლად წაუყენეს რუსეთის ფედერაციის სისხლის სამართლის კოდექსის 359-ე მუხლის მე-3 ნაწილით (დაქირავებული მონაწილეობა შეიარაღებულ კონფლიქტში).
რუსეთის პროკურატურა წერს, რომ 2022 წლის მარტში ელისაშვილი უკრაინაში “ქართული ლეგიონის” შემადგენლობაში იბრძოდა, მონაწილეობდა უკრაინის ტერიტორიაზე სამხედრო ოპერაციებში, მათ შორის, კიევის ოლქის ქალაქ ირპენის ბრძოლებში. 2022 წლის აპრილში მან დატოვა უკრაინის ტერიტორია და დაბრუნდა საქართველოში.
ე.წ. სასამართლომ მას აღკვეთის ღონისძიებად დაუსწრებლად პატიმრობა შეუფარდა.
„სამხედრო რომ ხარ, პოლკოვნიკის ჩინს რომ მოგანიჭებენ და მაგრად რომ გიხარია, დაახლოებით ასეთი განცდა მაქვს“, – ასე გამოეხმაურა „ტვ პირველის“ ეთერში ალეკო ელისაშვილი ამ ცნობას.
„ძალიან დიდი პატივია, რომ ასეთი გადაწყვეტილება მიიღეს რუსებმა ჩემ მიერ უკრაინელი ხალხის მხარდაჭერის გამო, ამ გმირი, თავდადებული, თავგანწირული ხალხის მხარდაჭერის გამო და მეორე მხრივ იმის გამო, რომ საქართველოს ეროვნულ ინტერსებს ვიცავდი“, – განაცხადა მან.
„მე უკრაინაში პირველ რიგში წამიყვანა იმან, რომ საქართველოსა და უკრაინის საერთო მტერთან მებრძოლა და საქართველოს ინტერესები დამეცვა“, – განაცხადა პოლიტიკოსმა.