108 წელი პატიმრობა მცირეწლოვანების გაუპატიურებისთვის – თურქეთის სასამართლომ დევნილთა ბანაკის თანამშრომელი, 29 წლის მამაკაცი 8 სირიელი ბიჭის წინააღმდეგ სექსუალურ ძალადობაში დამნაშავედ ცნო. დაზარალებული ბავშვები 8-დან 12 წლამდე ასაკის არიან.
გავრცელებული ინფორმაციით, სექსუალური ძალადობის შემთხვევები გაზიანტეპში მდებარე ნიზიპის დევნილთა ბანაკში მოხდა. მსჯავრდებულმა ბრალდება აღიარა და განაცხადა, რომ ბავშვებს ფულს უხდიდა. მისივე ინფორმაციით, ბანაკში მსგავსი შემთხვევები ხშირია და ასეთ ქმედებებში ბანაკში სხვა თანამშრომლებიც არიან ჩართულები.
შემთხვევას თურქეთში დიდი გამოხმაურება მოჰყვა.
გაზიანთეფის მიგრანტთა ბანაკს 14 ათასი ლტოლვილი აფარებს თავს. აპრილში აქ მცხოვრები თავშესაფრის მაძიებლები გერმანიის კანცლერმა ანგელა მერკელმა, ევროკავშირის პრეზიდენტმა დონალდ ტუსკმა და თურქეთის ყოფილმა პრემიერ-მინისტრმა აჰმეთ დავუთოღლუმ მოინახულეს.