ირანის პარლამენტში სპეცოპერაცია დამთავრდა. თეირანში განხორციელებული ტერაქტების ავტორები ირანის ანტიტერორისტული დანაყოფის მიერ ლიკვიდირებულნი არიან. ამის შესახებ ინფორმაციას BBC ავრცელებს.
სპეცრაზმმა პარლამენტის შენობაში ოთხი ტერორისტი მოკლა.
თავდამსხმელები, რომლებიც ქალის ტანსაცმელში იყვნენ გამოწყობილნი, დღეს დილით ცეცხლი გახსნეს პარლამენტის შენობაში, მოგვიანებით სროლა იყო აიათოლა ხომეინის მავზოლეუმში, სადაც ერთმა ტერორისტმა თავი აიფეთქა, ორმა კი ვიზიტორებს გაუხსნა ცეცხლი. ამის შემდეგ ეპიცენტრი კვლავ ირანის პარლამენტი გახდა, სადაც 4 ტერორისტი შეიჭრა, ცეცხლი გახსნეს და მათგან ერთმა თავი აიფეთქა.
ორივე ადგილას განხორციელებულ ტერაქტებს 12 ადამიანი ემსხვერპლა, 38-მდე კი დაშავდა.
თეირანში განხორციელებულ ტერორისტულ აქტებზე პასუხისმგებლობა ისლამურმა სახელმწიფომ აიღო. აღსანიშნავია, რომ ეს ისლამური სახელმწიფოს მიერ ირანში განხორციელებული პირველი ტერორისტული აქტია.