ესტონეთის პრეზიდენტმა, ალარ კარისმა ოთხშაბათს თავის ფეისბუკ-გვერდზე გამოაქვეყნა უცნაური შეტყობინება, რომელშიც ნათქვამია, რომ „სულელების გადაჭარბებული მოთხოვნების ატანა“ აღარ შეუძლია. ეს ერთი დღის შემდეგ მოხდა, რაც ყაზახეთში კარისის სახელმწიფო ვიზიტის შემდეგ, ამ ქვეყანაში ესტონეთის ელჩმა თანამდებობა დატოვა.
„უცებ გავხდი ზრდასრული“, – დაწერა კარისმა სოციალურ ქსელში, ოღონდ – არა ოფიციალურ საპრეზიდენტო პროფილზე, პირად გვერდზე.
„გარკვეულ რაღაცებს ვეღარ ავიტან. არა იმიტომ, რომ ამპარტავანი ვარ, არამედ უბრალოდ იმიტომ, რომ ცხოვრების იმ ეტაპს მივაღწიე, როცა აღარ მინდა დროის დაკარგვა იმაზე, რაც მაღიზიანებს ან გულს მტკენს“, – ნათქვამია პოსტში, რომელშიც პორტუგალიელი მწერლის, ჟოზე მიკარდ ტეიშეირას სიტყვებია ციტირებული.
„ვეღარ ავიტან სულელებისგან წამოსულ გადაჭარბებულ მოთხოვნებს. გაქრა სურვილი, ვასიამოვნო მათ, ვისაც არ მოვწონვარ. არ მაქვს მიზეზი, გავუღიმო მათ, ვისაც ჩემთვის გაღიმება არ სურს“.
პრეზიდენტის მრჩეველმა კომუნიკაციების საკითხებში, ჰანეს ჰამბურგმა ესტონეთის ტელე-რადიო მაუწყებელთან დაადასტურა, რომ პოსტი თავად პრეზიდენტმა დაწერა და ის არა პრეზიდენტის ოფიციალურ გვერდზე, პირად პროფილზე გამოაქვეყნა.
კარისის ოფისმა უარი თქვა განემარტა, თუ ვის გულისხმობდა პრეზიდენტი „სულელებში“.
კარისის ეს კომენტარი მოჰყვა საგარეო საქმეთა სამინისტროს განცხადებას იმის შესახებ, რომ ყაზახეთში ესტონეთის ელჩი, იააპ ორა, ნოემბერში ამ ქვეყანაში შემდგარი კარისის ვიზიტის შემდეგ, თანამდებობას დატოვებდა.
როგორც გამოცემა Eesti Ekspress-ი იტყობინება, ყაზახეთში ესტონეთის პრეზიდენტის ვიზიტის დროს კარისის მიერ წარმოსათქმელი სიტყვის თავდაპირველ ვერსიაში მნიშვნელოვან აქცენტი უკრაინის ომზე კეთდებოდა. დაძაბული ვახშმის შემდეგ და ყაზახური მხარის მიერ გამოთქმული შეშფოთების გათვალისწინებით, კარისმა გამოსვლის ტექსტი, ელჩ ორას რეკომენდაციით, გადაწერა და ის უფრო ბუნდოვანი და აბსტრაქტული გახადა.
პოლიტიკოსების თქმით, რომლებიც ესტონეთის ტელე-რადიო მაუწყებელს ესაუბრნენ, პრეზიდენტის საჯარო გამოსვლაში ყაზახეთში მისი ვიზიტის შედეგებზე იყო საუბარი.
პრეზიდენტის ოფისმა დაადასტურა, რომ პრეზიდენტი ჯანმრთელადაა. ოთხშაბათს საღამოს, მთავრობის წევრები და მათი მეუღლეები, პრეზიდენტის მიწვევით, კადრიორგში წინასაშობაო შეკრებას დაესწრებიან.
ბოლო დროს, კარისი მედიის ყურადღების ცენტრში სხვა მიზეზითაც მოექცა. ამის მიზეზი გახდა პრეზიდენტის გადაწყვეტილება, არ გამოექვეყნებინა კანონები შრომითი ხელშეკრულებების აქტისა და წვევამდელებისთვის ენობრივი მოთხოვნების შესახებ.
ამასთან, მან ფაქტობრივად გამორიცხა, მეორე ვადით იყაროს კენჭი საპრეზიდენტო არჩევნებზე, რომელიც მომავალ წელს გაიმართება. 7 ნოემბერს კარისმა Vikerraadio-ს განუცხადა: „ძნელი სათქმელია, რა მოხდება ამ არჩევნებზე. ახლა მხოლოდ იმის თქმა შემიძლია – პატარა სასწაული იქნება საჭირო იმისთვის, კენჭისყრაში მონაწილეობაზე რომ დამითანხმონ.“
ესტონეთის პრეზიდენტის თანამდებობას კარისი 2021 წლის 11 ოქტომბრიდან იკავებს.
https://news.err.ee/1609881658/president-i-can-no-longer-tolerate-excessive-demands-made-by-fools