ესტონური გამოცემა „საღამოს გაზეთის“ (Õhtuleht) ცნობით, პარტია „Eesti 200“-ის ორმა დეპუტატმა და შინაგან საქმეთა მინისტრის მრჩეველმა, ინდოეთში, დალაი ლამასთან ვიზიტის დროს, ზედმეტი დალიეს, რასაც მასპინძლების მხრიდან ზრდილობიანი შენიშვნა მოჰყვა.
ინდოეთში ვიზიტისას, ესტონელი დეპუტატების დელეგაცია უხერხულ სიტუაციაში აღმოჩნდა, როდესაც პარტია „Eesti 200“-ის წარმომადგენლებმა, იუკუ-კალე რაიდმა და მარეკ რეინაასმა, შინაგან საქმეთა მინისტრის მრჩეველ კადრი ნაპრიტსონ-აკუნასთან ერთად, იმაზე მეტი დალიეს, ვიდრე მასპინძლებმა შესაფერისად მიიჩნიეს.
20 ნოემბერს, რაიდი, რეინაასი და მათი კოლეგა დეპუტატები: მარჯიტ სუტროპი (Reform), ანტი პოოლამეტსი (EKRE) და ტიიტ მარანი (SDE) ინდოეთის ქალაქ დჰარამსალაში ტიბეტის დევნილ მთავრობასთან და დალაი ლამასთან შესახვედრად გაემგზავრნენ. დელეგაციას თან ახლდა რვა თანაშემწე.
მინისტრის მრჩეველმა, ნაპრიტსონ-აკუნამ, რომელმაც მგზავრობის ხარჯები თავად დაფარა, განაცხადა, რომ ეს მოგზაურობა პირად შვებულებად მიიჩნია და თავს ესტონეთის ოფიციალურ წარმომადგენლად არ თვლიდა, თუმცა განაცხადში ის დელეგაციის წევრად იყო მითითებული.
თანამგზავრებმა დაადასტურეს ალკოჰოლისადმი ამ სამეულის სიყვარული, რაც მათ არ უარუყვიათ.
სასმელისკენ მათი ლტოლვა ოფიციალურ შეხვედრაზე განხილვის საგანი გახდა, რომელსაც თავად რაიდი, რეინაასი და ნაპრიტსონ-აკუნა არ დასწრებიან.
გავრცელებული ინფორმაციით, მასპინძლებმა ესტონეთის დელეგაციას უთხრეს: „ჩვენ გვესმის, რომ ბევრი სასმლისა და სიგარეტის მოხმარება თქვენი კულტურის ნაწილია, მაგრამ ასევე უნდა გაიგოთ, რომ დალაი ლამა ძალიან მოხუცია და ალკოჰოლისა და თამბაქოს სუნს ვერ იტანს. თუ შეიძლება, გამოიჩინეთ ზრდილობა და იმ დღეს სმასა და მოწევას თავი აარიდეთ“.
„Eesti 200“-ის წევრმა დეპუტატებმა ეს გზავნილი დაადასტურეს. რეინაასმა თქვა, რომ ამას მშვიდად შეხვდა და იქვე განმარტა: „მჯერა, რომ ისინი ამ სიტყვებს არა მხოლოდ ჩვენ, არამედ ყველა სტუმარს ეუბნებიან; ეს, უბრალოდ, პროტოკოლია, რომელიც პროცედურულ საკითხებს შეეხება“.
„თქვენ, უბრალოდ, გშურთ“
მოგვიანებით, ნაპრიტსონ-აკუნამ სოციალურ ქსელში დაწერა, რომ ვიზიტის დროს ოფიციალურად შვებულებაში იმყოფებოდა, რაც დამსაქმებელთან შეთანხმებული იყო, და მგზავრობის საფასური თავად გადაიხადა.
„სულაც არ მრცხვენია იმის გამო, რომ შვებულებაში, თავისუფალ დროს, რამდენიმე ჭიქა ღვინო დავლიე. ვახშამზე ადგილობრივი რომიც კი გავსინჯე, რასაც, ვფიქრობ, შვებულებაში მყოფი ბევრი სხვა ზრდასრული ადამიანიც გააკეთებდა“, – დაწერა შინაგან საქმეთა მინისტრის მრჩეველმა.
სოციალურ ქსელში მან ასევე შეაქო დეპუტატი რაიდი, მას „ტიბეტური ქალაქის გმირი“ უწოდა და მიანიშნა, რომ ნებისმიერს, ვინც ჟურნალისტებთან დამახინჯებულ ინფორმაციას ავრცელებს, „მხოლოდ ის შურს, რომ ვერასდროს გახდებიან ისეთი როკ-ვარსკვლავები, როგორიც იუკუ-კალეა – ვერც აქ, და ვერც მსოფლიოს ნებისმიერ სხვა წერტილში“.
შინაგან საქმეთა მინისტრი, იგორ ტარო („Eesti 200“) საკითხისადმი მის ასეთ ერთობ მშვიდ მიდგომას გამოეხმაურა და განაცხადა, რომ შვებულების წესები დასვენების საშუალებას იძლევა, რაც, ჩვეულებრივ, კარგ საკვებსა და ღვინოსაც გულისხმობს.
შინაგან საქმეთა სამინისტროს კომუნიკაციების ხელმძღვანელმა, კაია სეპმა კი იხუმრა, რომ მედიას გამორჩა ნაპრიტსონ-აკუნას ფოტოები ჭიქით ხელში და ამას „ზარმაცი ჟურნალისტიკა“ უწოდა.
https://news.err.ee/1609884013/estonian-mps-dalai-lama-visit-marred-by-awkward-drinking-incident