ერაყის სახელისუფლებო ძალებმა ფალუჯას ჩრდილოეთით მდებარე ქალაქი საკლავია ტერორისტული დაჯგუფება „ისლამური სახელმწიფოსგან“ გაათავისუფლეს.
„ბი-ბი-სი“-ს ინფორმაციით, ერაყის შეიარაღებული ძალები ქალაქს, თითქმის, სრულად აკონტროლებენ. საკლავიას გათავისუფლება იმ მასშტაბური სპეცოპერაციის ნაწილია, რომელიც მიზნად ერაყის სტრატეგიული ქალაქ ფალუჯას ექსტრემისტებისგან გათავისუფლებას ისახავს.
დაეშის მებრძოლებმა ქალაქ საკლავიაზე კონტროლი 2014 წელს ხანგრძლივი ალყის შემდეგ დაამყარეს.
შეიარაღებულმა ძალებმა ფალუჯაში მცხოვრებ მოსახლლეობას საცხოვრებელი სახლების დატოვებისკენ მოუწოდა. ვინც ევაკუაცია ვერ მოახერხა, საცხოვრებელი სახლის თავზე თეთრი დროშა გამოფინა.
ექსტრემისტული დაჯგუფება ”ისლამური სახელმწიფოს” წინააღმდეგ ბრძოლა სირიაშიც მიმდინარეობს. სირიის სახელისუფლებო ძალებმა რუსეთისა და აშშ-ის კოალიციის დახმარებით რაქას პროვინციის საზღვარი გადაკვეთეს.