დღეს მოვაწერეთ მემორანდუმს ხელი – საქართველოში ჩამოსულია „აი-თი-ბი შანხაის დირექტორატი“, რომ ხელი მოგვეწერა მემორანდუმისთვის, რომ საქართველო 2026 წელს იქნება პარტნიორი ქვეყნის სტატუსით წარმოდგენილი „აი-თი-ბი ჩინეთზე“, რომელიც მაისის თვეში შანხაიში გაიმართება, – განაცხადა ტურიზმის ეროვნული ადმინისტრაციის ხელმძღვანელმა მაია ომიაძემ გადაცემაში „დღის ქრონიკა“.
მან „აი-თი-ბი ბერლინში“ წარმატებული მონაწილეობის გამოცდილებაც გაიხსენა, სადაც საქართველო მასპინძელი ქვეყნის სტატუსით იყო წარდგენილი.
„მასპინძელი ქვეყნისა და პარტნიორი ქვეყნის სტატუსები შინაარსობრივად ერთი და იგივეა – წინა პლანზე ხარ წამოწეული, გეძლევა შესაძლებლობა, საუკეთესო ადგილზე გქონდეს პავილიონი, იყო მთავარი მასპინძელი გალა მიღების, კულტურული პროგრამით წარსდგე.
შარშან მოლაპარაკებების დროს, როდესაც ვიმყოფებოდით გამოფენაზე შანხაიში, მიღებული იყო გადაწყვეტილება, რომ 2026 წელს ვიქნებოდით პარტნიორის სტატუსით. ამას ბევრი უპირატესობა აქვს. ჩინეთი არის ჩვენი სტრატეგიული ბაზარი. „აი-თი-ბი ჩინეთი“ და ზოგადად „აი-თი-ბი“ არის ძალიან რეპუტაბელური პლატფორმა იმისთვის, რომ მოხდეს ცნობადობის ამაღლება, ბიზნესკავშირების დამყარება, ზოგადად ჩვენი ქვეყნის პოპულარიზაცია“, – განაცხადა მაია ომიაძემ.
მან იმ ღონისძიებებზეც ისაუბრა, რომლებიც „აი-თი-ბი ჩინეთის“ ფარგლებში გაიმართება.
„გვექნება 400 კვადრატულ მეტრიანი სტენდი, სადაც 62 კომპანიისთვის იქნება შესაძლებელი, რომ წამოვიდეს, უკვე ღიაა რეგისტრაცია და ვიმედოვნებთ, რომ აქტიური იქნება კერძო სექტორი. ოფიციალური ღონისძიების წინა დღეს – 25 მაისს იქნება ოფიციალური მიღება, სადაც იქნება ოფიციალური გამოსვლები, 700 მაღალი რანგის სტუმრისთვის მასპინძლობა, რომელზეც შესაძლებლობა გვექნება, რომ ჩვენი ქვეყნის გასტრონომია და ღვინო წარმოვაჩინოთ. გვექნება ასევე კულტურული პროგრამა.
ყველა ქვეყანას თავისი მახასიათებელი აქვს, თუ რა აინტერესებთ ასაკების მიხედვით. ჩინეთის შემთხვევაში წამყვანი არის კულტურა და იგულისხმება ბევრი კომპონენტი – ბუნება, გასტრონომია, ღვინო, კულტურული მემკვიდრეობა, ფოლკლორი. შესაბამისად აქცენტები იქნება ამ ტრადიციულობაზე, განსხვავებულობაზე, იმაზე, რომ ვართ ძალიან ძველი ქვეყანა. ძალიან დიდ მნიშვნელობას ანიჭებენ დამწერლობას, აინტერესებთ ეს ისტორიული კომპონენტები და ამ ყველაფრის პრეზენტაცია მოხდება სხვადასხვა შესაძლებლობით“, – აღნიშნა მაია ომიაძემ.