ვფიქრობ, ჩვენს ინტერესებშია, გვქონდეს ძლიერი ურთიერთობა შეერთებულ შტატებთან და ევროპასთან, – ამის შესახებ დიდი ბრიტანეთის პრემიერ-მინისტრმა, კირ სტარმერმა განაცხადა.
ჟურნალისტმა სტარმერს ჰკითხა, ამყარებს თუ არა ის ევროპასთან უფრო მჭიდრო კავშირებს დონალდ ტრამპთან ურთიერთობის გაუარესების ფონზე, რაზეც დიდი ბრიტანეთის პრემიერ-მინისტრმა უპასუხა, რომ ევროპასა და აშშ-ს შორის არჩევანს არ აკეთებს.
კირ სტარმერის თქმით, თავდაცვის, უსაფრთხოებისა და ეკონომიკის საკითხებს როდესაც ეხება საქმე, დიდ ბრიტანეთს ევროპასთან უფრო ძლიერი ურთიერთობა სჭირდება. ამასთან, სტარმერი განმარტავს, რომ ევროპასთან უფრო მჭიდრო თანამშრომლობა ხელს შეუწყობს შეერთებულ შტატებთან ურთიერთობებს.
ბრიტანეთის პრემიერ-მინისტრმა, კირ სტარმერმა ასევე განაცხადა, რომ, ზეწოლის მიუხედავად, არ შეცვლის პოზიციას ირანის ომში ჩართვის საკითხზე.
სტარმერმა აღნიშნა, რომ მასზე „მნიშვნელოვანი ზეწოლა“ ხორციელდება, თუმცა პოზიციის შეცვლას არ აპირებს.
„როგორიც არ უნდა იყოს ეს ზეწოლა, რაც არ უნდა ისმოდეს, მე ვარ ბრიტანეთის პრემიერ-მინისტრი და ვალდებული ვარ, ჩვენი ქვეყნის ეროვნული ინტერესებით ვიხელმძღვანელო“, – განაცხადა ბრიტანეთის პრემიერ-მინისტრმა.
ცნობისთვის, აშშ-ის პრეზიდენტმა, დონალდ ტრამპმა 31 მარტს სოციალურ ქსელში დაწერა: „ყველა იმ ქვეყნისთვის, რომელსაც ჰორმუზის სრუტის გამო საავიაციო საწვავის მიღება არ შეუძლია, მაგალითად, გაერთიანებულ სამეფოს, რომელმაც უარი თქვა ირანის განადგურებაში მონაწილეობაზე, მაქვს რჩევა: პირველი, იყიდეთ აშშ-ისგან, ჩვენ ბევრი გვაქვს; და მეორე, მოიკრიბეთ გარკვეული გამბედაობა, წადით სრუტეში და უბრალოდ აიღეთ იგი“. ამასთან, ტრამპმა აღნიშნა: „თქვენ უნდა დაიწყოთ საკუთარი თავისთვის ბრძოლის სწავლა. აშშ აღარ იქნება თქვენს დასახმარებლად, ისევე როგორც თქვენ არ იყავით ჩვენთან. ირანი, ფაქტობრივად, განადგურებულია. რთული ნაწილი დასრულებულია. წადით და აიღეთ თქვენი ნავთობი“.