ირანის განადგურება ერთ ღამეშია შესაძლებელი და ეს შესაძლოა, სამშაბათს ღამით მოხდეს, ამის შესახებ აშშ-ის პრეზიდენტმა, დონალდ ტრამპმა განაცხადა.
„მთელი ქვეყნის განადგურება ერთ ღამეში შეიძლება და ეს შესაძლოა, ხვალ ღამით მოხდეს”- განაცხადა აშშ-ის პრეზიდენტმა.
ტრამპმა აღნიშნა, რომ ოპერაცია „ეპიკური მრისხანების“ ფარგლებში, აშშ „წარმოუდგენლად კარგად მუშაობს.”
„ისეთ დონეზე, როგორიც აქამდე არავის უნახავს“, – განაცხადა ტრამპმა.
ამასთან, აშშ-ის პრეზიდენტმა შეაქო ირანში ორი ამერიკელი სამხედროს გადარჩენა და ოპერაციას „ისტორიული“ უწოდა. მისი თქმით, სამხედროების გადარჩენის „გადაწყვეტილება“ რთული იყო, მაგრამ „ჩვენ არცერთ ამერიკელს არ ვტოვებთ უკან“.
„ჩვენ ძალიან კარგი აღდგომა გვქონდა. მგონი, ეს ერთ-ერთი საუკეთესო აღდგომა იყო ბევრი თვალსაზრისით. შემიძლია ვთქვა, რომ სამხედრო თვალსაზრისითაც ერთ-ერთი საუკეთესო იყო. აქ არიან ის ადამიანები, ვინც ყველაზე მეტად იყვნენ ჩართულები. დღეს აქ ვართ, რომ აღვნიშნოთ ერთ-ერთი ყველაზე დიდი, ყველაზე რთული და ყველაზე სახიფათო საბრძოლო სამძებრო ოპერაციის წარმატება. ალბათ, ამას სამძებრო-სამაშველო მისია შეიძლება, ვუწოდოთ, ერთ-ერთი ყველაზე მასშტაბური, რაც კი ოდესმე სამხედროებს უცდიათ. ჩვეულებრივ, როცა ომის დროს თვითმფრინავებს ჩამოაგდებენ, განსაკუთრებით მაშინ, როცა ძლიერ და ბოროტ ჯგუფს ებრძვი, მსგავსი ოპერაციები პრაქტიკულად არ ტარდება. ხშირად 200 კაცს აგზავნი ერთი ადამიანის გადასარჩენად და ეს ისეთი რამ არის, რასაც, მიუხედავად სურვილისა, იშვიათად ცდილობენ, რადგან დიდ რისკთანაა დაკავშირებული, ცუდი შედეგებიც შეიძლება მოჰყვეს. ამ შემთხვევაში კი, ჩვენ ორი ადამიანის გადასარჩენად ვიმოქმედეთ. შეიძლება, მსგავსი რამ აქამდე არც უცდიათ, მაგრამ ჩვენ ვცადეთ და შევძელით. გვყავდა ძალიან ძლიერი პროფესიონალები, თუმცა ცოტა იღბალიც დაგვეხმარა. ასევე დაგვეხმარა ბევრი ადამიანი, ძალიან კარგი ადამიანები. ამ ოპერაციაში მონაწილეობა დიდი პატივი იყო. ეს ისტორიული გადარჩენის ოპერაციაა და ისტორიაში ჩაიწერება“, – განაცხადა ტრამპმა.
დონალდ ტრამპის თქმით, აშშ-მა სხვადასხვა ხრიკები გამოიყენა, რათა ირანელებს დაეჯერებინათ, რომ პილოტი სხვა ადგილას იმყოფებოდა.
მისი თქმით, მეორე ამერიკელი პილოტის გამოსაყვანად განხორციელებულ სამაშველო მისიაში 155 თვითმფრინავი მონაწილეობდა, მათ შორის ოთხი ბომბდამშენი, 64 გამანადგურებელი, 48 საწვავის შესავსები ტანკერი, 13 სამაშველო თვითმფრინავი და სხვა.
„უნარების განსაცვიფრებელი დემონსტრირებით, ამერიკის სამხედროები ტერიტორიაზე შევიდნენ, მტერს დაუპირისპირდნენ, გადაარჩინეს ჩარჩენილი ოფიცერი და ყველა საფრთხე გაანადგურეს“, – განაცხადა ტრამპმა.
მისივე თქმით, ტერიტორია პილოტთან ერთად დატოვეს, რომელიც თითქმის 48 საათის განმავლობაში იყო ჩარჩენილი ირანის ტერიტორიაზე, ყოველგვარი დანაკარგის გარეშე.