სამხრეთ კავკასიის ქვეყნებს შორის ეკონომიკური და პოლიტიკური თანამშრომლობა ძალიან მნიშვნელოვანია, რათა უზრუნველყოფილი იყოს კეთილდღეობა, ძლიერი ეკონომიკა და რაც ყველაზე მნიშვნელოვანია, მშვიდობა, სტაბილურობა რეგიონში, – ამის შესახებ საქართველოს მთავრობის ადმინისტრაციის უფროსმა, ლევან ჟორჟოლიანმა ანტალიის დიპლომატიის ფორუმის ფარგლებში გამართულ პანელურ დისკუსიაზე განაცხადა.
მისი თქმით, საქართველოს ბოლო ოთხი წლის განმავლობაში ეკონომიკური ზრდის თვალსაზრისით ყველაზე მაღალი მაჩვენებლები აქვს ევროპაში.
„ჩვენი პრიორიტეტია ეკონომიკის განვითარება. მშვიდობა და ეკონომიკა ერთმანეთთან მჭიდროდ არიან დაკავშირებული. ბოლო ოთხი წლის განმავლობაში ყველაზე მაღალი მაჩვენებლები გვაქვს ევროპაში. ჩვენი ქვეყნის საშუალო ეკონომიკური ზრდის მაჩვენებელი 9.3 პროცენტი იყო, ხოლო მიმდინარე წლის იანვარ-თებერვალში 8.4-პროცენტიანი ეკონომიკური ზრდა დაფიქსირდა. სამხრეთ კავკასიის ქვეყნებს შორის ეკონომიკური და პოლიტიკური თანამშრომლობა ძალიან მნიშვნელოვანია, რათა უზრუნველყოფილი იყოს კეთილდღეობა, ძლიერი ეკონომიკა და, რაც ყველაზე მნიშვნელოვანია, მშვიდობა, სტაბილურობა რეგიონში. ეკონომიკური ზრდის ასეთი მაჩვენებლის საფუძველია ბიზნესის კეთების სიმარტივე. საერთაშორისო ინდექსების მიხედვით, მოწინავე ადგილზე ვართ. ასევე, ბიუროკრატიის ჭრილში კარგი მაჩვენებლები გვაქვს. სახელმწიფო ყველაფერს აკეთებს, რათა ხელი შეუწყოს და მოიზიდოს პირდაპირი უცხოური ინვესტიციები, გააძლიეროს ინფრასტრუქტურა და დაკავშირებადობის ფუნქცია. ჩვენი ქვეყნის გეოგრაფიული ადგილმდებარეობა საქართველოს ერთ-ერთი უპირატესობაა. ყველაფერს ვაკეთებთ, რათა გვქონდეს გამართული ინფრასტრუქტურა, განვახორციელოთ მსხვილი პროექტები, როგორებიცაა, მაგალითად, ანაკლიის ღრმაწყლოვანი პორტი, შავი ზღვის წყალქვეშა კაბელი. მიგვაჩნია, რომ მხოლოდ ასეთი ტიპის თანამშრომლობა არის წარმატების გასაღები“, – განაცხადა ლევან ჟორჟოლიანმა.