ჰერჩინსკის გზავნილი, რომ არასწორ არჩევანს თუ გავაკეთებთ, ბნელ წარსულს დავუბრუნდებით, მგონი, მიხეილ სააკაშვილის კრიტიკაა. წარსულში „ქართულ ოცნებას“ ჰქონდა მიღებული ვიზალიბერალიზაცია, ასოცირების ხელშეკრულება. ამიტომ წარსულში დაბრუნება „ქართული ოცნების“ პირობებში, მისი გადმოსახედიდან არაევროპული არ იქნებოდა, – ამის შესახებ პარტია „გირჩის“ ერთ-ერთმა ლიდერმა, ალექსანდრე რაქვიაშვილმა განაცხადა.
რაქვიაშვილის შეფასებით, ჰერჩინსკიმ აზრი ვერ ჩამოაყალიბა სწორად და საბოლოო ჯამში, არაადეკვატური განცხადება გააკეთა.
„გამოდის, ის, ფაქტობრივად, გვაშინებს მიხეილ სააკაშვილის დაბრუნებით, რაც ცოტა სასაცილოდ გამოიყურება და ჰერჩინსკიმ უბრალოდ აზრი ვერ ჩამოაყალიბა სწორად. შევარდნაძის, ან მიხეილ სააკაშვილის დასაწყის პერიოდს შეიძლება გულისხმობდეს, მაგრამ მგონი, უბრალოდ არასწორად ჩამოაყალიბა აზრი. იმდენად არაადეკვატური განცხადება გააკეთა საბოლოო ჯამში, რომ შეიძლება, შეეშალა რაღაც, ან შეიძლება, აცდა ჩვენს პოლიტიკურ რეალობას. მოგეხსენებათ, ბოლო დროს პოლიტიკა სპეციფიკურია საქართველოში და ძალიან ხშირად ელჩებს არ ესმით ხოლმე, აქ რა ხდება. შეიძლება, მასაც არ ესმის, რა ხდება ქვეყანაში. ზოგადად, ჩვენ გვაქვს ავტორიტარული რეჟიმი, შედარებაც არ არის საჭირო. ჩვენ არასდროს ვიყავით დემოკრატიის შუქურა, მაშინაც კი, როდესაც ამას გვეძახოდნენ. ამიტომ აქ არაფერი ტრაგიკული არ არის, უბრალოდ, გააჩნია, რას იგულისხმებს ჰერჩინსკი. განცხადება იმდენად ცოტა უსამართლოდ გამოიყურება, რომ შეიძლება, ყველაფერს გულისხმობდეს“, – განაცხადა ალექსანდრე რაქვიაშვილმა.
რამდენიმე ქართულმა მედიამ გაავრცელა საქართველოში ევროკავშირის ელჩის, პაველ ჰერჩინსკის მიერ ბრიუსელში, ევროპის საგარეო ქმედებათა სამსახურში გამართულ ღონისძიებაზე გაკეთებული განცხადება, რომლის თანახმადაც: „საქართველო გზაგასაყარზე დგას, საქართველოს მომავალი ჯერ არ დაწერილა, მაგრამ ის, რაც მომავალ კვირებსა და თვეებში გადაწყდება, განსაზღვრავს, ეკუთვნის საქართველო ევროპული ქვეყნების ოჯახს, რომელიც დაფუძნებულია დემოკრატიაზე, კანონის უზენაესობასა და ადამიანის უფლებებზე, თუ, სამწუხაროდ, თავის ბნელ წარსულს დაუბრუნდება“. ამასთან, ჰერჩინსკიმ აღნიშნა: „არ უნდა დავუშვათ, რომ საქართველო და შესანიშნავი, თბილი, სტუმართმოყვარე ქართველი ხალხი დაბრუნდეს ძალადობის, სამოქალაქო ომის, სიღარიბის, გაჭირვების, კორუფციის ბნელ დროში“.