არაბთა გაერთიანებულმა საამიროებმა განაცხადა, რომ ორშაბათს მისი ტერიტორიის მიმართულებით ირანიდან ოთხი რაკეტა გაუშვეს. ინფორმაციას ამის შესახებ გამოცემა AXIOS-ი ავრცელებს.
ეს პირველი შემთხვევაა, როდესაც ირანი ყურის ქვეყანას დაესხა თავს მას შემდეგ, რაც თითქმის ერთი თვის წინ ცეცხლის შეწყვეტა გამოცხადდა. შესაძლოა, აშშ და ირანი ახლა ომში დაბრუნების ზღვარზე აღმოჩნდნენ.
აშშ-ის ცენტრალური სარდლობის მეთაურმა, ადმირალმა ბრედ კუპერმა ორშაბათს ჟურნალისტებს განუცხადა, რომ მას შემდეგ, რაც აშშ-მა ოპერაცია დაიწყო, ირანმა სამხედრო გემების მიმართულებით ფრთოსანი რაკეტები, ხოლო კომერციული გემებისკენ უპილოტო საფრენი აპარატები გაუშვა.
მისი თქმით, ყველა მათგანი „მოგერიებული იყო“ და აშშ-ის სამხედრო-საზღვაო ძალების ან აშშ-ის დროშის ქვეშ მცურავ გემებს ზიანი არ მიყენებიათ.
კუპერის განცხადებით, აშშ-ის ძალებმა ირანული ექვსი მცირე ზომის კატარღა გაანადგურეს.
არაბთა გაერთიანებული საამიროების თავდაცვის სამინისტრომ განაცხადა, რომ ირანიდან ნასროლი სამი ფრთოსანი რაკეტის განეიტრალება მოხდა, ხოლო მეოთხე ზღვაში ჩავარდა. უწყებამ მოქალაქეებს განუმარტა, რომ ქვეყნის შიგნით გაგონილი ძლიერი აფეთქების ხმები სწორედ ამ საჰაერო თავდაცვითი ოპერაციების შედეგი იყო.