იტალიის პრემიერ-მინისტრმა, ჯორჯია მელონიმ ორშაბათს განაცხადა, რომ იგი მხარს არ დაუჭერს პრეზიდენტ დონალდ ტრამპის ნებისმიერ გადაწყვეტილებას იტალიიდან აშშ-ის ჯარების გაყვანის შესახებ.
„ეს არის გადაწყვეტილება, რომელიც ჩემზე არ არის დამოკიდებული და რომელსაც მე პირადად არ დავეთანხმებოდი“, – განუცხადა მელონიმ ჟურნალისტებს ერევანში, ევროპული პოლიტიკური გაერთიანების სამიტის ფარგლებში.
კითხვაზე, განიხილავს თუ არა ვაშინგტონი იტალიიდან და ესპანეთიდან ჯარების გაყვანას, ტრამპმა გასულ კვირას უპასუხა: „ალბათ“.
მელონიმ დასძინა, რომ იგი, სავარაუდოდ, შეხვდება აშშ-ის სახელმწიფო მდივანს, მარკო რუბიოს, რომელიც ამ კვირის ბოლოს რომში ჩავა მოლაპარაკებებისთვის, მათ შორის რომის პაპ ლეოსთან შესახვედრად.
კომენტარები