რა არის ევროკავშირისა და წევრი სახელმწიფოების ეკონომიკური ინტერესი და როგორია მათი პოლიტიკური ქცევის მოდელი – ამ საკითხებზე ისაუბრა „დღის ქრონიკაში“ პარლამენტის ვიცე-სპიკერმა ნინო წილოსანმა. როგორც მან აღნიშნა, ამ ორ ფაქტორს შორის აღრევას საქართველოს ხელისუფლება უკრაინაში ომის დაწყებიდან ხედავს.
„ეკონომიკური დაღმასვლა და ის ურთულესი კრიზისი, რომელშიც ევროკავშირი და თითოეული წევრი სახელმწიფოა, ირანში მიმდინარე ომის დროს არ დაწყებულა. ეს დაიწყო უკრაინაში მიმდინარე ომის დროს, როდესაც ის აგორებული ტალღა რუსეთის დასანქცირებასთან დაკავშირებით და მთლიანად ის პოლიტიკა, რომელიც ევროკავშირის ლიდერებსა და ბიუროკრატებს შეამუშავებინეს, პირდაპირ იყო მიმართული, რომ ევროპა მოეგლიჯათ რუსეთის გაზიდან, რუსეთის რესურსებიდან და ამით მნიშვნელოვნად დაეკარგა ევროკავშირს ის კონკურენტული უპირატესობა, რომელიც მსოფლიოში ჰქონდა. ამან თავის შედეგები გამოიღო. თუ გადავხედავთ ბოლო სამი წლის მონაცემებს ვნახავთ, რომ ნულთან მიახლოებული ეკონომიკური ზრდა აქვთ. განსაკუთრებული პრობლემები აქვს გერმანიას, ბალტიისპირეთის ქვეყნებს.
ამის ფონზე, როდესაც იმ ადამიანების წინაშე, ვინც იმ ქვეყნის ხალხმა აირჩია თავისი ინტერესების დასაცავად, ვხედავთ, რომ არა საკუთარი ქვეყნის ხალხის ინტერესს იცავენ, არამედ რაღაც ჩრდილოვან ბრძანებებს ასრულებენ. ეკონომიკური და ხალხის ინტერესი აცდენილია იმ მოქმედებებს, რომელიც ევრობიუროკრატებს აქვთ. აქ აქტიურად შემოდის საჭადრაკო ველზე საქართველო, რომელიც თავადაც იციან, რომ სასიცოცხლოდ მნიშვნელოვანია, რადგან საქართველო ევროპასა და აზიას დამაკავშირებელი რგოლია. ეს არის გამართული ქვეყანა თავისი ლოჯისტიკური ცენტრებით, თავისი სატრანსპორტო კომპონენტებით“, – აღნიშნა ნინო წილოსანმა.
როგორც მან აღნიშნა, საქართველო, როგორც ძლიერი სახელმწიფო, რომელიც მუდმივი ეკონომიკური ზრდის პროცესშია ქმნის იმ გარდაუვალ ფაქტორს, რომელსაც ვერცერთი ევროპული ქვეყანა და ვერც მისი ლიდერი ვერ დააიგნორებს.
საქართველოს როლს ევროპის ენერგეტიკულ უსაფრთხოებაში ახალი გეოპოლიტიკური ვითარება კიდევ უფრო ნათელს ხდის – ამის შესახებ სხვადასხვა გამოცემებში აქტიურად იწერება. ჰორმუზის სრუტეში მიმდინარე პროცესების გამო, იტალიის პრემიერ-მინისტრისა და აზერბაიჯანის პრეზიდენტის შეხვედრის შემდეგ, აქტიურად დაიწყო საუბარი ევროპულ ქვეყნებში გაზის აზერბაიჯანიდან იმპორტზე, ამ მარშრუტში კი გადამწყვეტ როლს, საქართველო თამაშობს. ანალიტიკოსი ჯეკ პრანდელი სატრანზიტო რუკას აქვეყნებს, სადაც აზერბაიჯანიდან ევროპის მიმართულებით გაზის მიწოდება, სწორედ საქართველოს გავლით ხდება.