ლოძის (პოლონეთი) კათოლიკური ეკლესიის არქიეპისკოპოსმა, კარდინალმა კონრად კრაევსკიმ, იძულებით გადაადგილებულ პირებთან მუშაობის მრავალწლიან პირად გამოცდილებაზე დაყრდნობით, დევნილთა მიმართ შიშებს „უსაფუძვლო“ და „პოლიტიკურად მოტივირებული“ უწოდა.
„მე მათთან ერთად წლების განმავლობაში ვცხოვრობდი, რეგულარულად ვხვდებოდი და ამ გამოცდილებაზე დაყრდნობით, მარტივად გეტყვით: საშიში არაფერია“, – განუცხადა კრაევსკიმ პოლონეთის სახელმწიფო საინფორმაციო სააგენტოს PAP-ს (Polska Agencja Prasowa).
კარდინალმა, რომელიც მანამდე ვატიკანში პაპის სოციალური მსახურების ხელმძღვანელად (ელემოსინარად) მსახურობდა, აღნიშნა, რომ რომში ყოფნის წლებში დევნილებს „ყოველ ნაბიჯზე“ ხვდებოდა. მისი თქმით, ადამიანთა მიგრაცია, ისტორიულად, ნორმალური მოვლენაა, რომელსაც წყლის, საკვების, სამსახურის ან მშვიდობის არარსებობა განაპირობებს.
პოლონეთის ისტორიაზე საუბრისას, მან მკაფიო პარალელი გაავლო: „როდესაც ქვეყანაში ომი იყო ან კომუნისტურ ეპოქაში ვცხოვრობდით, ან როცა უმუშევრობას ვაწყდებოდით, ჩვენ ამერიკაში გავრბოდით. დღეს პოლონეთი მდიდარი ქვეყანაა, მაგრამ ოცი მილიონი პოლონელი კვლავ მის საზღვრებს გარეთ ცხოვრობს. ნუთუ, მსოფლიოს პოლონელების ეშინია იმის გამო, რომ ისინი დევნილთა შთამომავლები არიან?“.
„ვფიქრობ, დევნილებით ხალხის შეშინება წმინდა წყლის პოლიტიკური საკითხია, რომელსაც გარკვეული ფარული დღის წესრიგი აქვს. ადამიანმა თვალები უნდა გაახილოს და დაინახოს, რომ მათ არსებობას არა მხოლოდ რისკები მოაქვს, არამედ შეიძლება სიკეთის მომტანიც კი იყოს ჩვენი ქვეყნისთვის“.
კრაევსკიმ შეაქო ომის დასაწყისში პოლონეთის მიერ უკრაინელი დევნილების მიმართ გამოვლენილი თავდაპირველი რეაქცია და გაიხსენა, რომ სპონტანურმა სტუმართმოყვარეობამ, რომელიც ჩვეულებრივმა ოჯახებმა გამოიჩინეს და არა ინსტიტუტებმა, ევროპა გააოცა. მან აღიარა, რომ მას შემდეგ საზოგადოებაში გარკვეული დაღლილობა შეინიშნება, რასაც თან ახლავს ჯანდაცვის სისტემასა და სახელმწიფო ფინანსებზე ზეწოლის შესახებ პრეტენზიები. თუმცა, კარდინალმა ხაზგასმით აღნიშნა, რომ მედია, ძირითადად, უგულებელყოფს იმ ფაქტს, რომ პოლონეთში ჩასული უკრაინელების უმრავლესობამ სამუშაო იპოვა და ქვეყნის ბიუჯეტში მნიშვნელოვანი წვლილი შეაქვს.
კრაევსკიმ, რომელიც კონფლიქტის დაწყების შემდეგ ათჯერ იმყოფებოდა უკრაინაში, გულწრფელად ისაუბრა ამ ქვეყანასა და ღაზაში მიმდინარე ომებთან მიმართებაში. მან იმ დინამიკაზე გაამახვილა ყურადღება, რომელიც თავად ნახა.
„უკრაინაში ყოველდღიურად ათასი ჯარისკაცი კვდება, რასაც ემატება მშვიდობიანი მოსახლეობის მსხვერპლი. როგორ შეიძლება, რომ ჩვენ ეს ომი არ შევაჩეროთ? როგორ შეიძლება, რომ ღაზაში ბავშვები, მთელი მსოფლიოს თვალწინ, შიმშილით კვდებოდნენ? პასუხი მარტივია: ომის შეჩერება არავის სურს, რადგან ამით ყველა სარგებელს იღებს. ქვეყნები აწარმოებენ იარაღს, რომელიც შემდეგ ვინმეზე უნდა გაიყიდოს. დიდი პოლიტიკა სასტიკია – მან არ იცის მოწყალება და პატიება. ეს არის მოგებისა და ზარალის გათვლა ცივი გონებით“.
კრაევსკიმ გამოსვლა პაპ ლეო XIV-ის სიტყვების ციტირებით დაასრულა, რომლის თანახმადაც, მყარი მშვიდობა თითოეული ადამიანის შიგნიდან იწყება. „თუ ჩვენ არ გვაქვს შინაგანი მშვიდობა, თუ ის არ არის ჩვენს ოჯახებსა და ქალაქებში, ეს მთელ მსოფლიოზე ვრცელდება. ჩვენ გვაქვს ომების შეჩერების საშუალებები, მაგრამ მათ არ ვიყენებთ“, – დასძინა მან.
წყარო: პოლონეთის სახელმწიფო საინფორმაციო სააგენტო PAP-ი.