ევროპული კეთილდღეობა ამერიკულ უსაფრთხოების ქოლგასა და რუსულ იაფ ენერგორესურსებზე იდგა, დღეს კი ორივე კითხვის ნიშნის ქვეშაა, — განაცხადა „დღის ქრონიკაში“ „ერთიანი ნეიტრალური საქართველოს“ საერთაშორისო მდივანმა, ვატო ქიზიყურაშვილმა.
მისი თქმით, ევროპაში ენერგომატარებლებსა და ყოველდღიური მოხმარების პროდუქტებზე ფასების ზრდა იმ სანქციებით არის განპირობებული, რომლებიც ევროპამ 2022 წელს დააწესა.
„არავისთვის არის ახალი და ყველასთვის კარგად ნათელია, რომ ევროპელებში ძალიან დიდი დაღლა შეინიშნება. ეს რიგითი ტურისტისთვისაც ნათელია. როდესაც ენერგომატარებლებსა და ყოველდღიური მოხმარების პროდუქტებზე ფასები იმატებს, ეს სწორედ იმ სანქციებით არის განპირობებული, რომლებიც მათ 2022 წელს დააწესეს.
ასევე უნდა აღინიშნოს, თუ რაზე იდგა ევროპული კეთილდღეობა და უსაფრთხოება. ეს იყო ამერიკული ქოლგა „ნატოს“ სახით და რუსული იაფი ენერგორესურსები. დღეს ვხედავთ, რომ ორივე ძალიან დიდი კითხვის ნიშნის ქვეშ დგას, რადგან ტრამპის ადმინისტრაციასთან ევროპელ ბიუროკრატებს საკმაოდ დაძაბული ურთიერთობა აქვთ. ვხედავთ ღია კრიტიკასაც, ხოლო რუსეთთან მიმართებით ამაზე საუბარიც აღარ არის საჭირო — ყველაფერი ნათელია. მათ თავად თქვეს უარი ამ იაფ ენერგორესურსებზე. სწორედ ეს არის ერთ-ერთი დიდი გამოწვევა“, — განაცხადა ქიზიყურაშვილმა.
მისი თქმით, ბოლო პერიოდში ცალკეული ევროპელი ლიდერები აღარ ერიდებიან საკუთარი როლის დამკვიდრების მცდელობას რუსეთ-უკრაინის კონფლიქტთან დაკავშირებით, თუმცა ამ საკითხზე ევროპაში კონსენსუსის მიღწევა უჭირთ.