აჭარაში ძლიერი წვიმისა და ქარის შედეგად ექვსივე მუნიციპალიტეტში სტიქია განვითარდა.
ხულოში უხვი ნალექის შედეგად სოფლებში დიაკონიზეებში, დანისპარაულში, რაქვთასა და იაკობიძეებში საცხოვრებელ სახლებთან მეწყერი ჩამოწვა. 7 ოჯახი უსაფრთხო ადგილასაა გადაყვანილი.
გააქტიურებული მეწყერული პროცესების შედეგად სულ აჭარაში 18 ოჯახს შეექმნა საფრთხე, ყველა ოჯახი უსაფრთხო ადგილზეა გადყვანილი.
შუახევში მეწყრის შედეგად ადიდებულმა მდინარემ წყალსაყრის ადმინისტრაციულ ერთეულში დაშალა 6 მ სიგრძის ბეტონის ხიდი. ხიდი ასევე დაზიანდა ხიჭაური-ჭვანის გზაზე. მეწყერი ჩამოვიდა ცენტრალურ გზაზე, რომლეიც ამჟამად ჩაკეტილია და ტრანსპორტი შეფერხებით მოძრაობს. ჩაკეტილია გზები სოფელ წყაროთაში და სოფელ კობალთაში. ქარმა დააზიანა მოქალაქეთა საცხოვრებელი სახლები და დამხმარე ნაგებობები. მეწყრული პროცესები განვითარდა დაბა შუახევში. ელექტროხაზების დაზიანების გამო ამჟამად დენი არ მიეწოდება შუბნის ამდინისტრაციული ერთეულების სოფლებს. უწყვეტ რეჟიმში მიმდინარეობს აღდგენითი სამუშაოები.
უამინდობამ პრობლემები ქობულეთშიც შექმნა. უხვი ნალექის შედეგად რიგ სოფლებში (ქაქუთი, ჩაისუბანი, ლეღვა) ჩაკეტილია გზები. ზედა აჭყვაში ჩაიკეტა ცენტრალური გზა. დაბა ჩაქვში დამბაზე გადმოვიდა მდინარე ჩაქვისთავი, დაიტბორა ერთი ოჯახი. სოფლებში ლეღვა, ჩაისუბანი, წყავროკა, ციხისძირი – რამდენიმე მოქალაქის საცხოვრებელ სახლთან განვითარდა მეწყრული კერები.
ხელვაჩაურის მუნიციპალიტეტში ორთაბათუმში, სამებასა და განთიადში რამოდენიმე მოქალაქის საცხოვრებელ სახლთან ჩამოწყვა მეწყერი. ყველა მიმართულებით მიმდინარეობს გაწმენდითი სამუშაოები.
რაც შეეხება ქედას, უხვი ნალექის შედეგად მეწყერი ჩამოწვა მოქალაქეების საცხოვრებელ სახლებთან შემდეგ სოფლებში: მეძიბნა, ზვარე, ძანაძეები, სირაბიძეები, ვარჯანისი, ჭინკაძეები, ცხემნა, ზენდითში და აგოთაში. სოფელ აბუქეთაში 9 ოჯახი უსაფრთხო ადგილას არის გადაყვანილი. დაბა ქედაში დაზიანდა შიდა სასოფლო გზები.
სასწავლო პროცესი მუნიციპალიტეტების ყველა სკოლაში შეუფერხებლად მიმდინარეობს.
უამინდობამ შეფერხებები შექმნა ელექტროენერგიის მიწოდების კუთხით. ამ ეტაპისთვის შუქი არ მიეწოდება ქობულეთში 500-მდე აბონენტს, ზემო აჭარაში 300-მდე აბონენტს. ,,ენერგო-პრო ჯორჯია“-ს მობილური ჯგუფები უწყვეტ რეჟიმში მუშაობენ. მიმდინარეობს აღდგენითი სამუშაოები. გააქტიურებული მეწყერული პროცესების შედეგად სულ აჭარაში 18 ოჯახს შეექმნა საფრთხე, ყველა ოჯახი უსაფრთხო ადგილზეა გადყვანილი. სტიქიასთან ბრძოლის მუნიციპალური შტაბები საგანგებო რეჟიმში მუშაობენ, მობილიზებულია სამაშველო ბრიგადები და მობილური ჯგუფები. მეწყრულ კერებს გეოლოგები ამინდის დადგომისთანავე შეისწავლიან.
უამინდობის შედეგები ბათუმში
ბათუმში განვითარებულმა უამინდობამ და ძლიერმა შტორმმა ბულვარში სანაპირო ზოლის რამდენიმე მონაკვეთი ქვიშითა და ქვაღორღით დაფარა. მთელი ღამის განმავლობაში ადგილზე მობილიზებული იყო რამდენიმე ერთეული სპეციალური ტექნიკა და სამაშველო ბრიგადები. დილიდან „აკვაპარკი“-ს მიმდებარე ტერიტორიაზე დაწყებულია შტორმის შედეგების სალიკვიდაციო სამუშაოები. ბათუმში მოსული უხვი ნალექისა და ქარის შედეგად უნივერსიტეტის საერთო საცხოვრებელს და რამოდენიმე მოქალაქის საცხოვრებელ სახლს დაუზიანდა სახლის სახურავი.
ასევე, შეიქმნა წყლის გამტარუნარიანობის პრობლემა არდაგანის ტბის მიმდებარედ, ქალაქის წყალმიმღები სანიაღვრე სისტემა გამართულად მუშაობს, თუმცა, ერთდროულად მოსული დიდი რაოდენობით ნალექის გამო დაგროვებული წყლის გადინება დროის მცირე მონაკვეთში შეფერხდა.
გარდა ამისა, ქარმა მოშალა რამდენიმე სარეკლამო ბანერი და სამშენებლო ღობე. მერიის შესაბამისმა სამსახურმა უკვე გააფრთხილა კერძო მესაკუთრეები, რათა პრობლემების დროულად აღმოფხვრა მოხდეს. ქალაქის სანიაღვრე სისტემა გამართულად მუშაობს. შეუფერხებლად გადაადგილდება საზოგადოებრივი ტრანსპორტი.
წყალმომარაგება აღდგენილია ყველგან, გარდა ჩაქვისა და ჩაისუბნის ე.წ. ძველი ქსელის აბონენტებისა. წყალმომარაგება სრულად სათავე ნაგებობაზე წყლის დონის დაწევისთანავე აღდგება. შპს ,,ბათუმის წყლის“ მობილური ჯგუფები რეგულარულად ახორციელებენ ქუჩების მონიტორინგს. გადაადგილების პრობლემა არ შექმნია საზოგადოებრივ ტრანსპორტს. ელექტროენერგია და ბუნებრივი აირი ბათუმის აბონენტებს შეუფერხებლად მიეწოდება.