„როგორ წარმოგიდგენიათ, ადამიანი, რომელიც ვინმეს ეძებს დასახმარებლად და მიიწევს მესაზღვრეებისკენ, ის შეიარაღებული იქნებოდა?” – ასე გამოეხმაურა პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი 2012 აჰმედ ჩატაევის ციხიდან გათავისუფლებას. მისივე განმარტებით, მას იარაღი არ ჰქონია და მიზეზიც არ არსებობდა ჩატაევის დაკავების.
„თქვენ იცით, რომ ჩატაევი 6 დღის განმავლობაში ხელებით მიცოცავდა ვინმესკენ, რომ თავისი სიცოცხლე შეენარჩუნებინა იმიტომ, რომ მას ფეხზე უკვე განგრენა ჰქონდა დაწყებული. როგორ წარმოგიდგენიათ, ადამიანი, რომელიც ვინმეს ეძებს დასახმარებლად და მიიწევს მესაზღვრეებისკენ, ის შეიარაღებული იქნებოდა?- ამაზე არასამთავრობოებმა, ჟურნალისტებმა ჩაატარეს კვლევა და დადგენილია, რომ მას იარაღი არ ჰქონდა. შესაბამისად, ამაზე გამოძიება რომ დაიწყო, მოწმეებმა ვერ დაადასტურეს, რომ მას ჰქონდა რაიმე ტიპის იარაღი და სასამართლოს არ ჰქონდა უფლება, ეს პირი უკანონოდ დაეკავებინა. ასე რომ მომხდარიყო, წამოვიდოდა ბრალდებები, რომ უკანონოდ, მძევლად გვყავდა ჩატაევი აყვანილი”, – განაცხადა ირაკლი სესიაშვილმა.