თბილისის საქალაქო სასამართლომ ხორავას ქუჩაზე არასრულწლოვანთა მკვლელობის საქმეზე კიდევ სამ პირს, აღკვეთის ღონისძიების სახით, პატიმრობა შეუფარდა.
პროკურატურამ სრულწლოვანი ბრალდებულების მიმართ პატიმრობა მოითხოვა, ერთი არასრულწლოვნის მიმართ მეთვალყურეობა, ხოლო 21 წლის ბრალდებულის მიმართ, _ გირაო.
პროკურორ იოსებ ხუციშვილის განცხადებით, პროკურატურამ კონკრეტული მტკიცებულებები და მოწმეთა ჩვენებები წარადგინა, სადაც აღნიშნულ პირთა ბრალეულობა იკვეთებოდა და სასამართლომ ბრალდების მხარის პოზიცია სრულად გაიზიარა.
„წარმოვადგინეთ კონკრეტული მტკიცებულებები და მოწმეთა ჩვენებები, რამაც დაარწმუნა სასამართლო, რომ დაეკმაყოფილებინა ჩვენი შუამდგომლობა”, – განაცხადა პროკურორმა.
თბილისში, ხორავას ქუჩაზე 1-ელ დეკემბერს არასრულწლოვნებს შორის დაპირისპირებას ორი მოზარდი ემსხვერპლა.