შინაგან საქმეთა მინისტრის მოადგილის, ნათია მეზვრიშვილის განცხადებით, ზოგადად, არასრულწლოვანთა შორის დანაშაული ბოლო წლების განმავლობაში მომატებული არ არის.
მეზვრიშვილის თქმით, უახლოეს მომავალში შესაძლოა მომზადდეს საკაკონმდებლო ცვლილებები, რომლებიც სკოლაში უსაფრთხოების გაძლიერებას და მანდატურების ინტიტუტის დახვეწას ითვალისწინებს.
„ზოგადად, ბოლო წლების განმავლობაში არასრულწლოვანთა შორის დანაშაული მომატებული არ არის, თუმცა დღეს ჩვენს ძირითად გამოწვევას წარმოადგენს 14 წლამდე პირების მიერ დანაშაულის ჩადენა, რომელზეც მოქმედი კანონმდებლობა სისხლის სამართლებრივ პასუხისმგებლობას არ ითვალისწინებს.
ამ მიმართულებით უწყებათაშორისი კომისია გვაქვს შექმნილი, რომლის ფარგლებშიც ერთი მხრივ, რეფერირების მექანიზმის დახვეწაზე ვმუშაობთ და მეორე მხრივ, სკოლაში უსაფრთხო გარემოს შექმნასა და მანდატურების ინსტიტუტის ეფექტურობას ვაფასებთ. არ გამოვრიცხავთ, რომ უახლოეს დღეებში გარკვეული საკანონმდებლო ცვლილებები მომზადდეს და ჩვენ პრევენციის მიმართულებით გავაქტიურდებით“, – განაცხადა მეზვრიშვილმა.