საპარლამენტო უმრავლესობის წევრმა ეკა ბესელიამ საქართველოს კათოლიკოს-პატრიარქს ილია მეორეს 85 წლის იუბილე მიულოცა.
„წარმოუდგენელია უფრო დიდი სიყვარული და პატივისცემა, უფრო დიდი ნდობა და მადლი, ვიდრე ჩვენს პატრიარქს, მის უწმინდესობას დაყვება… პატრიარქის დაბადება და 40 წელი ერის სულიერი წინამძღვრობა – უდიდესი წყალობაა ჩვენი ქვეყნის.
როგორი რუდუნებით, უსაყვედუროდ, სიყვარულით და თავგანწირვით ატარა ჩვენი სამშობლო ამ ქარტეხილებით სავსე გზაზე. რამდენი რამ დაითმინა და იტვირთა…
ვერაფერს ვერ ვადარებ ვერც მისეულ სიყვარულს, სიბრძნეს, მზრუნველობას და სითბოს…
ამდაგვარი მხოლოდ ჩვენს პატრიარქს შეუძლია!
ვერ დაითვლი, ვერ ამოწურავ, ვერ დაიტევ, ვერ… ვერ… მხოლოდ შეიძლება განიცადო… და უნდა დაიჯერო!
ჩვენ შესაძლოა კიდევ ვერ ვაცნობიერებთ, რა მადლი მოიღო უფალმა, რომ გვყავს ასეთი სულიერი მამა…
იმდენი დეტალი მახსენდება გასაოცარი და იდუმალი… იმდენი სიკეთე… შეუძლებელია უხმოდ ატარო ეს სიყვარული… შეუძლებელია არ უთხრა ხმამაღლა, რომ მადლიერი ხარ…
გილოცავთ თქვენო უწმინდესობავ და მადლობა უფალს თქვენი დაბადებისთვის! ძალიან, ძალიან დიდხანს გვიწინამძღვრეთ”, – ნათქვამია ეკა ბესელიას მილოცვაში.