ოზურგეთში ძლიერმა ქარმა სახლებს სახურავები ახადა და ხეები მოგლიჯა

ოზურგეთის მუნიციპალიტეტში ძლიერმა ქარმა რამდენიმე სოფელში საცხოვრებელი სახლების სახურავები დააზიანა და ხეები მოგლიჯა.
“ძლიერ ქარმა დაბა ნარუჯასა და დაბა ნასაკირალში მრავალბინიან კორპუსებს სახურავის ნაწილი გადახადა. მოთხრილია ხეები და დაზიანებულია გაზის მილები. ქარმა პრობლემები სოფელ მთისპირსა და ნაგომარში შექმნა. ადმინისტრაციულ შენობებსა და კერძო საცხოვრებელ სახლებს სახურავი გადახადა. პრობლემებია სოფელ ოზურგეთსა და ქალაქ ოზურგეთის ცენტრალურ ქუჩებზე. იაკობ შემოქმედის, წულუკიძის, ბესიკის, აღმაშენებლის და ჩოხატაურის ქუჩებზე რამდენიმე საცხოვრებელ სახლს სახურავი აქვს გადახდილი. რამდენიმე უბანს ელექტროენერგია შეზღუდულად მიეწოდება. შემთხვევის ადგილზე ოზურგეთის მერი კონსტანტინე შარაშენიძე და მერიის ინფრასტრუქტურის სამსახურის თანამშრომლები იმყოფებიან. ხვალ მერიაში შექმნილი სპეციალური კომისია ზარალს დაითვლის. ამ დროისთვის ოზურგეთში ძლიერი ქარია”,- აცხადებენ ოზურგეთის მერიაში.