სამოქალაქო ავიაციის სააგენტოს ფრენის უსაფრთხოების ინსპექტორ როსტომ მასურაშვილს უცხო ქვეყნის საჰაერო ხომალდის უსაფრთხოების განსაზღვრის პროგრამის (SAFA) წევრი სახელმწიფოების (ევროკავშირის და EASA-ს წევრი 47 ქვეყანა, კანადა, არაბეთის გაერთიანებული საემიროები, სინგაპური) საავიაციო ხელისუფლებების ინსპექტირების უფლებამოსილება მიენიჭა.
ევროპის საავიაციო უსაფრთხოების სააგენტოს სრულუფლებიანი აუდიტორი საქართველოს წარმომადგენელი პირველად გახდა.
აღნიშნული კვალიფიკაციის მისაღებად, სამოქალაქო ავიაციის სააგენტოს SAFA-ს ეროვნულმა კოორდინატორმა გაიარა სავალდებულო ტრეინინგები, დამკვირვებლის სტატუსით (Observer) მონაწილეობა მიიღო ჩეხეთის რესპუბლიკის საავიაციო ხელისუფლების შემოწმებაში, EASA-ს სტანდარტიზაციის აუდიტის ჯგუფის ზედამხედველობის ქვეშ მყოფი წევრის სტატუსით (Standardization team member under supervision) მონაწილეობდა საფრანგეთის საავიაციო ხელისუფლების აუდიტში.
„EASA-ს სრულუფლებიანი აუდიტორის სტატუსით, ივლისში მასურაშვილი მაკედონიის საავიაციო ხელისუფლებას შეამოწმებს. აღსანიშნავია, რომ თავად სამოქალაქო ავიაციის სააგენტომ EASA-ს SAFA-ს პროგრამის სტანდარტიზაციის აუდიტს 2013 წელს უმასპინძლა.
შემოწმებით არ გამოვლენილა არცერთი ნაკლოვანება, რაც დღემდე პირველი პრეცედენტია SAFA-ს პროგრამის მონაწილე წევრი ქვეყნებისთვის. ევროპის საავიაციო უსაფრთხოების სააგენტოს გადაწყვეტილებით, ინსპექტირებების გარდა, სამოქალაქო ავიაციის სააგენტოს სპეციალისტი ჩართული იქნება EASA-ს ბაქანზე ინსპექტირების რეგულაციების დახვეწის მიზნით შექმნილი ქვე ჯგუფის მუშაობაში (Ramp Inspection Coordination and Standardization RICS Sub Group). SAFA-ს წევრი სახელმწიფოების მიერ შევსებული კითხვარების საფუძველზე ჯგუფში 8 ქვეყნის საავიაციო ხელისუფლების წარმომადგენელი შეირჩა (ავსტრია, კანადა, საფრანგეთი, საქართველო, იტალია, ესპანეთი, შვეიცარია, დიდი ბრიტანეთი).
უცხო ქვეყნის საჰაერო ხომალდების უსაფრთხოების განსაზღვრის ევროკავშირის პროგრამაში (SAFA) საქართველო ჩართულია „ევროგაერთიანების, მისი არა-წევრი SAFA-ს პროგრამაში ჩართული სახელმწიფოების აეროპორტებსა და საქართველოს აეროპორტებში დაშვებული საჰაერო ხომალდის უსაფრთხოებასთან დაკავშირებული ინფორმაციის შეგროვებისა და გაცვლის შესახებ“ EASA-სა და სამოქალაქო ავიაციის სააგენტოს შორის არსებული სამუშაო შეთანხმების ფარგლებში.
შეთანხმების თანახმად, სააგენტო უფლებამოსილია მოახდინოს უცხო ქვეყნის საჰაერო ხომალდის საინსპექციო შემოწმება, რომლის მიზანია იმის დადგენა, რომ საჰაერო ხომალდის ტექნიკური მდგომარეობა, ეკიპაჟი, საბორტო საბუთები და საავარიო-სამაშველო მოწყობილობები შეესაბამება დადგენილ საერთაშორისო სტანდარტებს“,-აღნიშნულია ინფორმაციაში.