პატრიარქი ილია მეორე ქალაქ გენუაში ხიდის ჩამონგრევის შედეგად დაღუპულთა გამო, იტალიელ ხალხს და პრეზიდენტს უსამძიმრებს.
„ბატონო პრეზიდენტო, დიდად ვწუხვართ ქალაქ გენუაში ხიდის ჩამონგრევის შედეგად მომხდარი ტრაგიკული შემთხვევის გამო, რომელმაც მრავალი ადამიანის სიცოცხლე შეიწირა.
აღვავლენთ ლოცვებს, რათა გარდაცვლილთა ოჯახის წევრებსა და ახლობლებს, ასევე დაზარალებულთ ღმერთმა მისცეს სულიერი ძალა ამ მძიმე განსაცდელის გადასატანად. მიიღეთ ჩვენი თანაგრძნობა. გთხოვთ, სამძიმარი გადასცეთ მათ და იტალიელ ხალხს. ღრმა პატივისცემით სრულიად საქართველოს კათოლიკოს-პატრიარქი“ , – ნათქვამია პატრიარქის წერილში.
იტალიელ ხალხს მიუსამძიმრა საქართველოს პრეზიდენტმა.
გენუაში საავტომობილო ესტაკადის 200-მეტრიანი მონაკვეთი 14 აგვისტოს ჩაინგრა. ბოლო მონაცემებით, დაღუპულია 39 ადამიანი, დაშავებული კი – 16.
მაშველების თქმით, შესაძლოა ხიდის კიდევ ერთი ნაწილი ჩავარდეს და საცხოვრებელ სახლებს დაეცეს.
მომხდარის ერთ-ერთ მიზეზად მეხის დაცემა სახელდება. მორანდის ხიდი, რომელსაც სახელი ინჟინერ-კონსტრუქტორის, რიკარდო მორანდის პატივსაცემად დაარქვეს, თითქმის 1200 მეტრის სიგრძისაა. ის 1967 წელს გახსნეს.