თბილისის საქალაქო სასამართლომ ბრიტანეთის მოქალაქეს ჯეკ შეფარდს წინასაექტრადიციო 3 თვიანი პატიმრობა შეუფარდა.
მოსამართლე რომან ხორავამ აღნიშნული გადაწყვეტილება რამდენიმე წუთის წინ გამოაცხადა.
სასამართლო დარბაზში ბრიტანული მედიის წარმომადგენლებიც ესწრებოდნენ.
ბრალდებულის ადვოკატის მარიამ კუბლაშვილის განცხადებით, დაცვის მხარე ბრალდების მხარის შუამდგომლობას დაეთანხმა.
„მოსამართლემ განიხილა პროკურატურის შუამდგომლობა, რასაც დაცვის მხარეც დაეთანხმა. ამ ეტაპზე უმჯობესია ჯეკ შეფარდი პატიმრობაში დარჩეს და მას მსჯავრი დაედოს“, – განაცხადა მარიამ კუბლაშვილმა.
ცნობისათვის, 23 იანვარს შს სამინისტრომ გაერთიანებული სამეფოს ძებნილი მოქალაქე თბილისში დააკავა.
1987 წელს დაბადებულ ჯ.ს.შ. ვაკე-საბურთალოს პოლიციის სამმართველოში 23 იანვარს ადვოკატებთან ერთად გამოცხადდა და საქართველოს პოლიციას ნებაყოფლობით ჩაბარდა.
ქართველი და ბრიტანელი სამართალდამცველების თანამშრომლობით, ჯ.ს.შ.-ზე საერთაშორისო არხებით ძებნა მიმდინარე წლის 12 იანვრიდან გამოცხადდა.
31 წლის ბრიტანელი ლონდონის ცენტრალური კრიმინალური სასამართლოს მიერ დამნაშავედ იქნა ცნობილი გაუფრთხილებლობით ერთი პირის სიცოცხლის მოსპობის გამო და 6 წლით თავისუფლების აღკვეთა მიესაჯა.
შემთხვევა 2015 წლის 8 დეკემბერს მოხდა.