“კრიტიკა არ უნდა დაემსგავსოს რაღაც ტყუილების გავრცელებას, “ფეიკ ნიუსი“ არ უნდა იყოს “რუსთავი 2- ზე“

ტელეკომპანია „რუსთავი 2-ის“ დირექტორი, პაატა სალია მიიჩნევს, რომ არხზე უნდა იყოს კრიტიკა, თუმცა ეს უნდა იყოს მაქსიმალურად დასაბუთებული. მისივე თქმით, აღნიშნული მედიასაშუალება მაღალი პროფესიონალიზმით უნდა გამოირჩეოდეს.
​„ჩემთვის მნიშვნელოვანია, არხი იყოს კრიტიკული, უბრალოდ, ჩემი სურვილია, ეს კრიტიკა იყოს მაქსიმალურად დასაბუთებული და არ იყოს მხოლოდ და მხოლოდ სიტყვები. საუბარი მაქვს პროფესიონალურ კრიტიკაზე. მე მივიჩნევ, რომ ჩვენი არხი უნდა იყოს გამორჩეული მაღალი პროფესიონალიზმით. ვგულისხმობ იმას, რომ მაქსიმალური კრიტიკა, მაგრამ მაქსიმალური ობიექტურობისა და მაქსიმალური სიმართლის ფარგლებში, ანუ ეს კრიტიკა არ უნდა დაემსგავსოს რაღაც ტყუილების გავრცელებას, „ფეიკ ნიუსი“ არ უნდა იყოს „რუსთავი 2- ზე“.
​მე მივიჩნევ, რომ „რუსთავი 2“ უნდა იყოს მაქსიმალურად კრიტიკული და ეს კრიტიკა მაქსიმალურად დასაბუთებული უნდა იყოს, რაც კრიტიკის ობიექტს არ მისცემს შესაძლებლობას, რომ ბრალდებები ჰქონდეს ჩვენი ტელევიზიის მიმართ“, – განაცხადა პაატა სალიამ.