თბილისის მერი დედაქალაქის მთავარ ნაძვის ხეს ევროპაში ერთ-ერთ საუკეთესოდ თვლის. ამის შესახებ კახა კალაძემ გადაცემა „შაბათის ქრონიკაში“ განაცხადა.
„მე მგონია, რომ თბილისის მოსახლეობა ნამდვილად იმსახურებს ისეთ განათებულ ქალაქს, როგორიც არის წელს. გემოვნებაზე რთულია იდავო, თუმცა მე მგონია, რომ წლევანდელი ნაძვის ხე ნამდვილად არის განსხვავებული და შემიძლია ვთქვა, რომ ევროპაში არის ერთ-ერთი საუკეთესო“, – განაცხადა კალაძემ.
მისი თქმით, მერია ყოველდღიურად ცდილობს ქალაქში წინასაახალწლო განწყობის შექმნას, თუმცა დესტრუქციული ოპოზიცია საზოგადოებაში ნიჰილიზმის გაღვივებას ცდილობს.
“არსებობს ოპონენტები, რომლებსაც აქვთ სურვილი და მონდომება, რომ მაქსიმალურად შექმნან ნიჰილიზმი, რაც ძალიან ცუდია.არ მომწონს ის დესტრუქციული ქმედებები, რაც ხდება ბოლო თვეების განმავლობაში. ძალიან ცუდია ეს ყველაფერი. თუმცა ჩვენ ამ დესტრუქციულ პოლიტიკოსებზე მაღლა უნდა დავდგეთ. ჩვენი ქალაქიც უნდა გავალამაზოთ, უნდა მივხედოთ ყველა იმ პრობლემას, რომელიც აწუხებს თბილისელებს და ამას აუცილებლად გავაკეთებთ“,- თქვა კალაძემ.