“მომავალი მთავარი ევროპული ქალაქები და რეგიონები პირდაპირი უცხოური ინვესტიციებისთვის 2020- 2021 წლებში“ – ამ სახელწოდებით გამოაქვეყნა რეიტინგი გაზეთ „The Financial Times- ის“ სპეციალურმა რესურსმა fDi Intelligence, სადაც თბილისი პირდაპირი უცხოური ინვესტიციების რენტაბელობის (Cost Effectiveness) მიხედვით ევროპის წამყვან ქალაქებს შორის პირველ ადგილზე დასახელდა.
ქალაქების შერჩევა ისეთი კატეგორიების მიხედვით განხორციელდა, როგორიცაა: ქონების რეგისტრაციის საფასური, მოგების გადასახადი, მშენებლობის ნებართვა, სამრეწველო ხარჯები და სხვა.
აღნიშნული რეიტინგი 2003 წლიდან მზადდება. რეიტინგი ერთ-ერთ ყველაზე ავტორიტეტულად მიიჩნევა და ბიზნესის კეთების, საინვესტიციო კლიმატის განვითარებისა და ცხოვრების დონის მიხედვით ევროპული ქალაქების ანალიზს მოიცავს.
ანგარიშში გაანალიზებულია ევროპული ქალაქების შესაძლებლობები პირდაპირი უცხოური ინვესტიციების მიმართულებით, ასევე, გამოვლენილია გამარჯვებულები სხვადასხვა ისეთი კატეგორიის მიხედვით როგორიცაა: მომავალი ევროპული ქალაქების TOP 25, ქალაქების ათეული ადამიანური კაპიტალისა და ცხოვრების დონის, ბიზნესისადმი მეგობრული გარემოს, ეკონომიკური პოტენციალისა და კავშირების მიხედვით.
კვლევის ფარგლებში მონაცემები 505 ლოკაციიდან (მათ შორის: 319 ქალაქი, 148 რეგიონი და 38 სპეციალური ზონა LEP) 100-მდე სხვადასხვა ინდიკატორის გათვალისწინებით (მათ შორის: მშპ, უცხოური ინვესტიციების მოცულობა, დანახარჯები განათლებაზე, საშუალო ხელფასი, გადასახადების მოცულობა, ინოვაციური ტექნოლოგიების ინტეგრაცია, პროფილური რეიტინგები და სხვა) შეგროვდა.