სოციალური ქსელის მომხმარებელი ინტერნეტში პოსტს აქვეყნებს.
“ჩინეთის შემდეგ, კორონავირუსით ყველაზე მეტი დაავადებული სამხრეთ კორეაშია.
ყველაფერი დაიწყო 61 წლის ქალით, ქალაქ ტეგუდან, რომელიც ადგილობრივი ქრისტიანული სექტის წევრია.
ვირუსის გავრცელება კორეაში სწორედ ამ სექტის წიაღში დაიწყო. როგორც ეპიდკვლევამ აჩვენა, რელიგიური შეკრების დროს ამ ქალს 200-მდე ადამიანთან ჰქონდა კონტაქტი.
სულ 9 ათასი ადამიანია ამ სექტის წევრი კორეაში. ზოგი კარანტინში წაიყვანეს, ზოგი თვითიზოლაციაში მოაქციეს, მაგრამ ვირუსის შეჩერება ბოლომდე მაინც ვერ მოხერხდა. მაგალითად, ამ სექტის ერთ-ერთმა წევმა საავადმყოფოში მოინახულა ავადმყოფი ახლობელი და ცოტა ხანში ამ საავადმყოფოს რამდენიმე პაციენტს გამოუვლინდა ვირუსი, ერთი მათგანი გარდაიცვალა.
ამ სექტის ხელმძღვანელმა ბოდიში მოიხადა საჯაროდ იმის გამო, რომ სწორედ მათგან გავრცელდა ვირუსი.
მოკლედ, ეს საათივით აწყობილი მდიდარი ქვეყანა, რომელსაც მსოფლიოში ერთ-ერთი საუკეთესო ჯანდაცვის სისტემა აქვს, რას არ აკეთებს და რა ფულს არ ხარჯავს, მაგრან მაინც მძიმე მდგომარეობაშია.
კორონავირუსის ახალი შემთხვევები ყოველდღიურად იზდება და ამ ტენდენციას ჯერჯერობით ვერ აჩერებენ.
ჯარის მობილიზებაც გამოაცხადეს – სადეზინფექციო სამუშაოებს ატარებენ ჯარისკაცები ქუჩებში, ტრანსპორტში და საჯარო ადგილებში.
ახლა წარმოიდგინეთ, რა მოხდება, ასეთი მასობრივი ინფიცირება რომ მოხდეს ღარიბ ქვეყანაში, რომლის ჯანდაცვის სისტემა და ზოგადი ორგანიზებულობა ახლოსაც ვერ მივა კორეულთან. მაგალითად საქართველოში. ჩვენნაირი ქვეყნისთვის ინფიცირების ეს მასშტაბი უმძიმესი იქნებოდა.
ნებისმიერი ადამიანი, რომელიც ამ დღეებში იცავს ჯანდაცვის მსოფლიო ორგანიზაციის რეკომენდაციებს (და ხელების დაბანის შემდეგ მთავარი რეკომენდაცია სწორედ ხალხმრავალი ადგილებისგან თავის არიდებაა), ავტომატურად ზრუნავს არა მხოლოდ საკუთარ თავზე, არამედ საკუთარ ოჯახზე, ახლობლებზე, მოხუც მშობლებზე და ბებია-ბაბუაზე, რომლებისთვისაც ბევრად რთული იქნება ამ ვირუსის გადატანა.
ჩემს მეგობრებს მინდა ვთხოვო, არ წახვიდეთ წირვაზე რაღაც პერიოდის განმავლობაში. მით უმეტეს, მოარიდეთ ხალხმრავლობას ხანდაზმულები. ნუ აკოცებთ ხატებს ეკლესიაში და ნუ ეზიარებით საერთო ჭურჭლიდან. თორემ, თუ ვირუსი შეგხვდათ და სხვასაც გადასდეთ, მერე შეიძლება მთელი ცხოვრება სანანებლად გაგიხდეთ ეს წინდაუხედაობა.
მაგალითად, რუმინეთის მართლმადიდებელმა ეკლესიამ იზრუნა თავისი მრევლის ჯანმრთელობაზე და ზუსტად ამ რეკომენდაციებით მიმართა მრევლს.
მარტო წირვაში არაა საქმე. არც, მაგალითად, კინოში წასვლაა მიზანშეწონილი და არც ბავშვების წაყვანა გასართობ ცენტრში.
ამ დღეებში სახლში დარჩენა არ ნიშნავს პანიკას. პირიქით, ეს ნიშნავს სიმშვიდეს და გონიერებას.” – წერს სოფო ბუკია.