დაავადებათა კონტროლის ეროვნული ცენტრის დირექტორი ამირან გამყრელიძე აცხადებს, რომ ტაძრებში სადეზინფექციო სამუშაოების ჩატარებისთვის საპატრიარქოსგან ოფიციალურ მიმართვას ელოდებიან.
როგორც Imedinews-ს ამირან გამყრელიძემ განუცხადა, ამ საკითხზე პირადად მას და ცენტრის წარმომადგენელს სატელეფონო კომუნიკაცია ჰქონდათ საპატრიარქოსთან. მისივე თქმით, მეუფე ნიკოლოზის განცხადების შემდეგ ერთ-ერთმა კერძო ბიზნესმენმა გამოთქვა სურვილი, რომ საპატრიაროს სადეზინფექციო საშუალებებით დაეხმაროს.
„აღნიშნულთან დაკავშირებით ველოდბით საპატრიარქოსგან ოფიციალურ მიმართვას, რის შემდეგაც გაირკვევა, რა მოცულობის სადეზინფექციო საშუალებების გამოყენებაა საჭირო და რამდენ ტაძარში უნდა ჩატარდეს. იმედს გამოვთქვამ, რომ აღნიშნული ბიზნესმენის ქმედებას სხვა პირებიც მიბაძავენ და უახლოეს დღეებში გარკვეულ ტაძრებში დეზინფექცია ჩატარდება“, – განაცხადა გამყრელიძემ.
ამასთან, Imedinews-ს საპატრიარქოში განუცხადეს, რომ ტაძრებში სადეზინფექციო სამუშაოების ჩატარების შესახებ საპატრიარქოს დაავადებათა კონტროლის ცენტრისთვის ოფიციალურად ჯერჯერობით არ მიუმართავს.
საქართველოს მთავრობის უწყებათშორისი საკოორდინაციო საბჭოს მიერ მიღებული გადაწყვეტილების შესაბამისად, კორონავირუსის პრევენციისა და პროფილაქტიკის მიზნით ქვეყნის მასშტაბით სხვადასხვა დაწესებულებაში ინტენსიური სადეზინფექციო სამუშაო მიმდინარეობს.