ინფექციურ საავადმყოფოში 42 პაციენტი იმყოფება, აღებულია 4 სინჯი და პასუხს ველოდებით. მანამდე აღებული 6 სინჯიდან ერთს დაუდასტურდა კორონავირუსი. ამის შესახებ კლინიკის დირექტორმა თენგიზ ცერცვაძემ ჟურნალისტებს განუცხადა.
მისივე განმარტებით, სამი პაციენტის გარდა, ყველას იტალიასთან აქვს შეხება. მისთვის უცნობია, იმყოფებოდა თუ არა ინფიცირებული თვითიზოლაციაში, ახლა მას ტემპერატურის მცირე მატება აქვს.
სულ 7 პაციენტს აქვს ორმხრივი პნევმონია, მათგან ერთის მდგომარეობა იყო მძიმე და ტენდენცია არის გაუმჯობესებისკენ.
რამდენად მზად არის ინფექციური ახალი პაციენტების მისაღებად, თენგიზ ცერცვაძემ აღნიშნა, რომ უკვე გამოყოფილია 5 ჰოსპიტალი და მათ პაციენტების მიღება დაიწყეს, ამიტომ, პრობლემა ადგილების მხრივ არ არის.
„ძალიან რთული წარმოსადგენია, რომ რამდენიმე დღეში ასეული შემთხვევა დაფიქსირდეს. კიდევ მივიღებთ დაახლოებით 20 კაცს. თუ გავითვალისწინებთ ევროპაში განვითარებულ მოვლენებს, ასევე ამერიკაში, რა თქმა უნდა, შემთხვევების მატებას ველოდებით“, – აღნიშნა თენგიზ ცერცვაძემ.
საქართველოში კორონავირუსით ინფიცირებულთა რიცხვი 25-მდე გაიზარდა.